RIHA - Çalakîya "Nobeta Edaletî" ya keyeyê Şenyaşarî roja 837ine de dewam kena. Çalakîya ewro de no mesaj ame dayîş: “Fadil Şenyaşar ke pî û di birayê ci ameyî qetilkerdiş, serê fermanê serdestan bi 5 serrî yo hucreyê yewkesî de yeno tepiştiş! Qey no edalet o?” 

 

14ê hezîrana serra 2018ine de merdim û pawitoxê Parlamenterê AKPyî yê Rihayî yê verê Îbrahîm Halîl Yildizî qezaya Pirsûsî ya Rihayî de hêrişê keyeyê Şenyaşarî kerd. Hêriş de mêrde û di lajê Emîne Şenyaşar ameyî qetilkerdiş. Emîne Şenyaşar û lajê aye Parlamenterê Partîya Çep a Keske yê Rihayî Ferît Şenyaşar ke qirkerdiş ra bi birîndarî xelas bibi, 9ê adara 2021ine de vernîya Edliyeyê Rihayî de dest bi Nobeta Edaletî kerdebî. Çalakîya keyeyî roja 837ine de dewam kerd. Emîne Şenyaşare seba nêweşîyanê xo, nobete qezaya Pirsûsî de keyeyê xo de dewam kerd.

 

Keyeyî derheqê babete de serê hesabê xo yê medyaya dijîtale de mesajêke pare kerd. Mesaj de wina venga Wezîrê Edaletî Yilmaz Tunçî rê kerd: “5 serrî derbaz bî. Pêwa ke destnêdayîşê kesê qirkerdişê nêweşxaneyî organîze kerd û nêverda hêzê asayîşî karê xo bikerê rawuşta zî çira hema zî tepişte nîyo! Fadil Şenyaşar ke pî û di birayê ci ameyî qetilkerdiş, serê fermanê serdestan bi 5 serrî yo hucreyê yewkesî de yeno tepiştiş! Qey no edalet o?”