Mîdye Miqted

 

HELEB - Cinîyê taxa Şexmeqsûdî tecrîdo girankerde yê serê Rayberê PKKyî Abdullah Ocalanî şermezar kerdî û vatî: "Ma fek têkoşînê xo ra vera nêdanê, heta ke ma rayberê xo azad bikerê."  

 

Derheqê Rayberê PKKyî Abdullah Ocalanî ke Zîndanê Îmraliyî yê Tîpa Fyî yê Asayîşê Berzî de yeno tepiştiş ra 28 aşme yo ke ci ra tu xebere nîna girewtiş. Avûkatê Buroyê Asrinî hewte de di reyan seba pêvînayîşî muracat kenê la bi pozîtîf yan zî negatîf tu cewabêke nêdîyeno înan. Tecrîdo ke hemverê Abdullah Ocalanî de yeno rayraberdiş tesîrê xo pêroyê komelî ser de keno. Vera tecrîdî de reaksîyon û nêrazîbîyayîşê şarî zî dewam keno. Cinîyê ke taxa Şêxmeqsûdî ya Helebî de ciwîyenê reaksîyonê xo ardî ziwan. 

 

Emîne Beyreme dîyar kerd ke bi serran o tecrîd dewam keno û wina vat: “Rayberî bi serran o binê tecrîdêk giran de xover dano. Eynî wext de zî tu xebere ci ra nîna girewtiş. Hemverê nê çîyî de zî her roje çalakîya ma dewam kena ke vengê ma bireso rayaumûmî.” 

 

'Çareserîya probleman esta’ 

 

Emîneye qiseykerdişê xo wina dewam kerd û bale ant çareserîya probleman ser: “Ewro rayberê ma seba pêroyê çareserîya munaqaşa û problemê Rojhelatê Mîyanenî ronayo raşte. Heme dewletî ewro hetgirîya dewleta tirke kenê. Destê înan dewletan dewamkerdiş û girankerdişê tecrîdî de esto. Çike projeyê Neteweyê Demokratîke ke rayberê PKKyî Abdullah Ocalanî ronayo raşte, seba heme dewletanê sermayedaran tehluke yo.” 

 

Venga CPTyî kerdî

 

Emîne, venga Komîteyê Vernîgirewtişê Îşkenceyî yê Konseya Ewropayî (CPT) kerd û peynî qiseykerdişê xo ard: "Ma venga pêro rêxistinê heqê merdiman,  CPT û avûkatan kenê ke seba azadîya rayberî vengê xo berz bikerê û bikewê mîyanê liv û tevgerî. Eynî demî de pêro komelê aştîwaştoxî û komelê kurdî zî seba rayberî çalakîya xo dewam bikerê ke azadîya fîzîkî ya rayberê xo pê bîyarê." 

 

'Ma azadîya fizîkî wazenê'

 

Lajê Sedîqe Memud Reşo zî 30 serrî yo Tirkîya de tepişte yo û wina bale ant serê tecrîdî: "Rayberê ma û bi hezaran kurdî ewro zindanê dewleta tirke ya faşistî de ameyê tepiştiş. Ma venga rêxistinê heqê merdiman kenê ke hemverê kerdişanê xofî de bêveng nêmanê û tutê ma û eynî wextî de zî rayberê aştîye Abdullah Ocalanî zindanî ra xelas bikerê." 

 

Sedîqe, qiseykerdişê xo peyîn wina qedêna: "Şarê kurdî waştişê azadîya rayberî kenê. La ma seke dayîk ma do gonî bidê heta ke ma azadîya fîzîkî ya rayberê xo pê bîyarê. Bi hezaran şarî wayîrê bi serek ê û ma zî serekê xo wazenê."