Oznûr Deger

 

MÊRDÎN - Hunermende Kudret Uçuke seba kampanyaya ke semedê hunermenda Kurd a tepişte Nudem Durake dîyaya destpêkerdiş qisey kerd û vat: “Ma destur nêdê ke wa vengê hunermendanê kurdan bêro birnayîş.” 

 

Hunermenda kurde Nudem Durake zîndanê Tîpa Myî ya Bayburtî de tepişte ya. Nudeme rê 19 serrî ceza ameye birnayîş û 8 serrî yo ke zî zîndan de ya. Seba azadîya Nudeme koma Kampanyaya Free Nudem Durake 29ê Hezîrane de kampanyayêke mîyanneteweyî da destpêkerdiş. Kampanya bi îmzeya 46 nuştox, rejîsor, hunermend, muzîsyen û rojnamegeranê namdaran ameye weşanayîş û metnê kampanyaya seba Nudem û tepişteyê sîyasî de azadîye yena waştiş û heto bîn de venga rayaumûmîye zî yena kerdiş. 

 

Komeleya Kultur û Hunerî ya Mezopotamyayî ra hunermend Kudret Uçuka ke dersê sazî dana, derheqê kampanyaya ke dîyaya destpêkerdiş de qisey kerd. 

 

‘Hunermendê kurdî binê tecrîdî de yê’ 

 

Kudrete dîyar kerd ke aye heme hunermendanê tepişteyan silam kena û wina vat: “Nudeme tutîya xo de dest bi muzîkî kerdbî. Ma eynî emrî de û eynî wextî de dest bi hunerî kerd. Nudeme hunerî ra zaf hes kerdêne. Waştêne ke hunerê xo bida rayraberdiş. Şexsê Nudeme de heme hunermendê kurdî yenê tecrîdkerdiş. Ma hunermendî eynî çîyan ciwîyenê. Ma bi ziwanê xo huner kenê. Coka ra zext yeno kerdiş. La tu kesêk nêeşkeno hunerî sînor bikero, zextan bikero.” 

 

‘Ganî hunermendî nê barî wedarnê’ 

 

Kudrete dewamê qiseykerdişê xo de da zanayîş ke her cayê dinya de vîşêrê kurdan her kes eşkeno hunerê xo bi ziwanê xo bikero û çend aşme verê cû muzîsyen Cîhan Aymaz Stenbol de ameybî qetilkerdiş. Kudrete wina dewam kerd: “Hunermendê kurdî seba ke deyîrê ke yenê waştiş nêvanê yenê qetilkerdiş. Ganî ma hîna zêde wayîrê hunermend û hunerî bivejê. Ewro seba Nudeme pêroyê dinya de veng ameye berzkerdiş. Kampanya dîya destpêkerdiş. La Tirkîya û Kurdistan zaf bêveng ê. ganî heme hunermendî nê barî wedarnê.” 

 

‘Ma do wayîrê kulturê xo bivejê’ 

 

Kudrete qiseykerdişê xo yê peyênan de bale ant zextê serê hunerê kurdî û vat ke heme merkezê kultur û dezgehî ameyî girewtiş û vat: “Seba hunermendan her ca raşteyê hunerî yo. Seba ma her ca raşteyê kultur, her ca raşteyê hunerî yo. Sewbîna zî ganî ma seba kampanyaya ke semedê Nudeme raşteyê mîyanneteweyîye de dîyaya destpêkerdiş, Tirkîya ra zî paştîdayîş bidê. Ma wayîrê embaza xo bivejê, siba beno ke ma zî sey înan bêrê tepiştiş. Ganî wayîrê huner û nasnameyê hunerî bêro vejîyayîş.”