AMED - Îdarekara DDKADî Halîde Dundar ke nêweşxaneyê ke ci de ameyîne dermankerdiş seba nêweşîya qelbî dinyaya xo bedelnaye, Goristanê Yenîkoyî de ameye definkerdiş.

 

Cenazeya Îdarekara Komeleya Cinîyanê Şorişgêran ê Demokratîke (DDKAD) Halîde Dundara ke 61 serrîya xo de seba nêweşîya qelbî, nêweşxaneyê ke Stenbol de ameyîne dermankerdiş dinyaya xo bedelnaye, Goristanê Yenîkoyî yê qezaya Rezanê Amedî de ameye definkerdiş. Verfeka Partîya Çep a Keske ya Amedî Pinar Sakik Tekîn, Îdarekarê Sendîkaya Kedkarê Perwerde û Zanistî (Egîtîm-Sen) ê Stenbolî, aktîvîstê Tevgerê Cinîyanê Azadan (TJA), Komeleya Cinan a Rosa, Yewîya Cinîyê Kurdî, merdim û embazê aye beşdarê merasîmî bî.

 

Dimayê wecîbeyê dînî, cenazeya Halîde ameye definkerdiş. Hevala Halîde, Rahîme Kesîcî ke serê gorê aye de qisey kerd û vat: “Halîde merdimêke zaf rî huyaye bî. Serê nameyê aye de xeylê dewa ameyî akerdiş. Wexto ke ameyîne tepiştiş zî yarîye xo kerdêne û huyayîne. Aye tedayan ra nêtersayîne. Pêwa pêro tedayan zî rayîrê ke rayra şîne de bi bawerî laver şîne. Tevgerê aye ma rê bî nimûne."

 

Hevala Halîdeyê Methiye Azbay zî dîyar kerd ke Halîde bi nasnameyê xo yê kurdewarî û cinî bedelê tewr giran da û wina vat: "To bi kede û têkoşînê xo bi bawerî rayra şîne. Şima têkoşînê ke nînê xovîrakerdiş da. Ne ma û ne zî kesêk bîn şima xo vîr ra nêkenê."

 

Merasîm dimayê wendişê duayan peynî bi.

 

Sewbîna şînê Halîde Dundare Keyeyê Şînî yê Licê de ame ronayîş.