Mîdye Miqted

 

HELEB - Endamê Kongra Starî ya taxa Şêxmeqsûdî caardişê dewleta tirke şermezar kerdî û venga rêxistinê heqê merdiman kerdî ke bi wezîfeyê xo hemverê nê sucan de werizê. 

 

Merkezê Çimdarîya Heqê Merdiman a Sûrîye (SOHR) pê hesna ke çeteyê ‘Hemzat’î yê girêdayeyê dewleta tirke dewa Ciwêqî ya Efrînî de destdergê bi tuta 13 serrî kerd. Heto bîn de 6ê gulana 2023yî de zî çeteyê ‘Emşat’î qezaya Şîyê de hêrişê cînsî bi tuta 10 serrî kerdbî. Hemverê qewimîyayîşê ke pê ameyî de dezgeh û dezgehê cinîyan ê Vakur û Rojhelatê Sûrîye reaksîyon mojnayî û venga dezgehanê heqê merdiman ê Ewropa kerdî ke hemverê caardişan de reaksîyon bi mojnê. 

 

Endama Komînê Şehîd Şîlane ya Kongra Starî Zeyneb Osman reaksîyon mojnaye caardişê destdergîye û wina vat: “Qewimîyayîşê hovî yê dewleta tirke yê mîyanê Efrînî de vera cinî û tutan de no bî û 5 serrî yo ke her roje reyna bena. La tewr peynî destdergêya hemverê tuta 13 serrî ya Efrînî êdî vera exlaqî yo. Netîce de tutê ma Efrîn ra koçber benê. Qey hemverê nê qewimîyayîşan de rêxistinê heqê merdiman bêveng ê û bê wezîfe manenê.” 

 

'Rêxistinê heqê merdiman bêveng ê'  

 

Zeynebe dewamê qiseykerdişê xo de da zanayîş ke hemwelatijê Efrînî binê şert û mercanê tewr giranan de serê herra xo de xover danê û vera nê çîyan her roje yenê qetilkerdiş, bi destdergî û caardişê hovî reyde rî bi rî manenê û wina dewam kerd: “Rêxistinê heqê merdiman timî venga heqê merdiman kenê la qey seba Efrînî bêveng manenê? Dewleta tirke bi rayîrê nê caardişan wazena îradeyê şarê kurdî binpay bikera. La şarê kurdî hende serrî yo ke seba azadîya xo têkoşînêk bênimune dano rayraberdiş. Ganî rêxistinê heqê merdiman zî hemverê nê suc û caardişan de bêveng nêmanê.” 

 

'Wazenê kurdan qir bikerê'  

 

Endama Komîngehê Şehîd Gulê Selmoye, Mizgîn Reşîde zî reaksîyonê xo yê hemverê nê qewimîyayîşan mojna û wina vat: “Demê peyênan de Efrîn de caardişê hovî yê sey qetilkerdiş û destdergîya hemverê tutan zêde bîyo. La çi heyfo ke hemverê nê caardişan de rêxistinê heqê merdiman û rêxistinê tutan bêveng ê û pasîf ê. Ma venga heme rêxistinan kenê ke hemverê nê caardişan de êdî bi wezîfeyê xo werizê payan ser û eynî wext de dewleta tirke bi nê suc û caaardişan wazena komelê kurdî qir bikera.” 

 

Mîzgîne qiseykerdişê xo yê peyênan de venga têkoşînî kerd û vat: “Ma qet fek têkoşînê xo ra vera nêdanê. La wa rêxistinê heqê merdiman bi wezîfeyê xo werizê payan ser. Destgerîya hemverê tutan ke yena kerdiş, caardişê tewr bê exlaq o û ganî hesabê nê çîyî bêro persayîş.” 

 

'Bêvengî bena sebebê caardişan'   

 

Endama Komîteya Perwerdeyî ya Komîngeha Gulê Selmoye, Sozdar Îbrahîme zî derheqê destdergîya hemverê tutan de wina ercnayîş kerd: “Destdergîya hemverê tutan zîhnîyetê faşîst ê dewleta tirke yo û vejîyeno raşte. La eynî wext de bêvengîya rêxistinê heqê merdiman zî cesaret dano dewleta tirke.”