Medîa Mîqted

 

HELEB - Cinîyê ke bi wesîleya yadkerdişê Zeynep Kinaciye (Zîlan) Taxa Şêxmeqsudî ya Helebî de ameyî têkişt şexsê komelê kurdî de hedefgirewtişê cinîya kurde şermezar kerd û vatî ke bi rayîrê hedefgirewtişê cinîye wazenê kurdan qir bikerê. Cinîyan vera qirkerdişan de sozê girdkerdişê têkoşînê Zîlane û hemrayanê aye dayî. 

 

Zeynep Kinaci (Zîlane) 30ê Hezîrana 1996î de merkezê Dêrsimî de merasîmê beyraqe ya artêşa tirke de çalakîya fedayî pê ard û dinyaya xo bedilnaye. Çalakîya Zîlane seba cinîyê kurdî bî sebebê girdkerdişê têkoşînî û bî sembola xoverdayîşî. Bi na wesîleye her serre serrgêra na çalakîye de Zîlane yena yadkerdiş û çalakîya aye yena silamkerdiş. Cinîyê Sîyasetmedarî yê rojawanê Kurdistanî bi wesîleya na roje Taxa Şêxmeqsûdî ya Helebî de çalakîya yadkerdişî pê ardî. 

 

Cinîyê ke tewrê çalakîya yadkerdişî bîyî ajansê ma rê qisey kerdî û bale antî serê hêrişê vera cinîya kurde ke demê peyênan de zêde bîyê. 

 

'Na roje seba ma rojêke tarîxî ya'  

 

Endama Meclîsê Şehîd Gelhat a raşteyê Şerqî ya Şêxmeqsûdî Nehle Mistefa bale ant têkoşînê Zîlane ser û vat ke aye yadkerdişê şehadetê şehîd Zîlane de heme şehîdanê ke rayîrê azadîye de canê xo feda kerdî bi rêzdarî vîr ana. Nehele dewamê qiseykerdişê xo de wina vat: “Ma sey heme têgêrayîşê cinîye yê taxa Şêxmeqsûdî vanê ke na roje seba ma rojêke tarîxî ya. Cinîyê ke prosesê tarîxî de waştî xo û pêroyê cinîyan binê zincîrê koletîye ra bixelisnê, têkoşînê tewr gird vera dewleta faşîst de dayî. La heme dewletê ke xo bi kapîtalîzimî girê dayî ewro bi rijnayîşê gonîya şarê kurdî wazenê menfîetanê xo bipawê û coka ra çi hewfo ke ewro dewleta tirke bi siyasetê ke aver bena ya qirker hêrişê serkêşanê cinîyanê kurdan kena.” 

 

'Ma sozê dewamkerdişê tekoşînî danê' 

 

Nehleye peynîya qiseykerdişê xo de vat: “Şexsê nê cinîyê serkêşan de dewleta tirke wazena îrade û îdareya heme cinîyê kurdî û bi taybetî cinîyê têkoşerî çinî bikera. La ma sey cinîyê ke xo bi fikr û felsefeya Rayberî girê dayê, ma soz danê ke ma do timî serê rêça şehîdanê xo de şêrê.” 

 

'Embaza Zîlan û hemrayê aye sembolê cuya hemdemî yê’ 

 

Endama Meclîsê Partîya Yewîya Demokratîke (PYD)  Eyşe Hisoye zî wina vat: “Serrgêra 27ine ya şehadetê şehîd Zîlane de ewro heme raşteyan de cinîyî bi hêrs û rengêk ke têkoşînê xo gird bikerê vejîyayî aver.” 

 

Eyşeye bale ant serê destpêkerdişê tarîx û bi xususî hedefgirewtişê cinîyê yê aye wextî û wina vat: “Têgêrayîşê Azadîya Kurdistanî ra ver bi xususî komelê kurd de cinî her roje bi çinîkerdiş, qirkerdiş û kiştişî reyde rî bi rî mendêne. Raştîye de qerarê çinîkerdişê kurdan şexsê cinîya kurde de vetî aver. La roja ma ya ewro de bi xususî serê herra Vakur-Rojhelatê Sûrîye de êdî serê mîrasê aye de têkoşînê tarîxî, xebate û xoverdayîşê cinîye hîna gird beno û cinîye heme raşteyê komel, leşkerî, ekonomî û dîplomasîye de bîya wayîrê statu. Eynî wextî de têkoşîno ke embaz Zîlan û hemrayê aye ma rê verdayî seba ma sembolê cuya hemdemî yo.” 

 

'Ma qerarê dewamkerdişê têkoşînî da’ 

 

Eyşeye  qiseykerdişê xo wina dewam kerd û vat: “Ma zîhnîyetê faşîst û îqtîdarî tena şexsê hukmatê dewleta tirke de nêgênê dest. Heme dewletan de zîhnîyetê faşîst esto û no hedefgirewtişê wirdî xebatkar û serkêşê cinîye Yusra Derwêş û Reyhan Emûdeye de xo da teber. La no zî vernîya tekoşînê ma nêgirewt. Çike ma qerarê dewamkerdişê têkoşînî dayo. Ma baş nê çîyî zanê ke ma seba dewleta tirke babeta qirkerdişî yê.” 

 

‘Sîstemê demokratîk sîstemê hegemonîkî tersneno’ 

 

Eyşe qiseykerdişê xo yê peyênan de nê çîyan ard ziwan û vat: “Semedo ke mezgê îqtîdarî şexsê dewleta tirke de cinîyan keno hedefê xo, sîstemê demokratîke ke xo serê na herre de dayo îsbatkerdiş dewleta tirke û heme sîstemê îqtîdarî wazenê serê na herre de komel û nijadan çinî bikero û qir bikero. La ma sey cinîyê xebatkarî sozê têkoşînê xo newe kenê û vanê ke ma sîstemê netewê demokratîke ke bîyo çareserîya heme problemanê sîyasî serê herra Rojhelatê mîyanenî de ser bifînê. Herwext do îradeyê nê şarî aver de bo û ser bikewo.” 

 

'Averşîyayîşê komelî girêdayeyê averşîyayîşê cinîye yo'  

 

Derheqê aynî babete de Hetgira Meclîsê Pêroyî ya Taxa Şêxmeqsûd û Eşrefîye Arîn Henane zî ercnayîş kerd û vat: “Şexsê şehîd Zîlane de ma bedenê xo vernîya heme şehîdanê cinîye yê ke xo rayîrê azadîya şaran de feda kerdî, çewt kenê. Dişmen her tim hêrişê cinîyan keno û înan keno hedefê xo. Seba ke averşîyayîşê cinîye xo reyde averşîyayîşê komelî ano. Dewleta tirke her çend ke cinîyan her tim bikera hedef zî her roje sey nê cinîyê têkoşerî bi hezaran cinîyî vejîyenê aver. Ma zî sey cinîyê Taxa Şêxmeqsûdî sozê berzkerdişê tekoşînî newe kenê û vanê ke ma xeta têkoşînî ya şehîd Zîlane taqîp bikerê û heme cinîyan azad bikerê."