Rojda Aydin

 

AMED -  Seba Hedîye cuye saete 04.00î de dest pêkena, bi keda destê xo debara xo kena. Çiqas zehmetîyê kar û barê rojane ana ziwan zî weşîya cuya xozayî zî ana xo vîr.

 

Roniştoxê dewa Elîbeganê qezaya Gêlî ya Amedî bi çinitiş û weykerdişê heywanan debara xo kenê. Dewe de nîske, niha, genim, cew û sebze yenê ramitiş û bi nê debara xo kenê. Sewbîna daranê fêkîyan ra zî feyde gênê. Ajansê ma verê xo da dewe û waşt ke cuya rojane ya cinîyan bîyara ziwan. 

 

Ajansê ma bi Hediye Yakut reyde qisey kerd. Hedîye çiqas zehmetîyê kar û barê rojane ard ziwan zî weşîya cuya xozayî zî ard vîr.

  

‘Dewe de her çî xozayî yo’

 

Hedîyeya ke 54 serrî ya, bi weykerdişê heywanan û ramitişê zebze û genim debara xo kena. Hedîye, dîyar kerd ke pêro çî xozayî yo û wina vat: "Ma genim, cew û nîskan ramnenê. Sewbîna baxçeyê ma zî esto û ez zebzeyan zî ramênena. Xêrcê înan zî heywanan zî wey kena. Ez penêr û mast zî viraznena. Kergê mi zî estê. Bi nînan debara xo kena."

 

Bi rotişê zebze, fêkî, şit û mast debara xo kena

 

Hedîye, da zanayîş ke baxçeyê aye de zebzeyê sey xiyar, petêx, firîngî, îsot, balîcan, fasûlî, bamye, zergûnîyê tewir bi tewir xeylêk çî estê û vat: “Xêrcê nînan zî darê fêkîyan estê. Wexto ke dinya germ bena karê ma zî zehmet beno. Ez zaf kede dana û zehmetîyê nê karan zî ancena. Ewro nê zebze û fêkiyê ke bazarê Amedî de yenê rotiş ma bi destê xo ramnenê. Seba nê ma tu fêkî û zebzeyan bajar ra nêgînê. Tenê çîyê sey rûn, meqerne û ûsn. bajar ra gênê. Ma bi rotişê zebze, fêkî û şit û mast debara xo kenê." 

 

Cuye saete 04.00ine de dest pêkena 

 

Seba Hedîye cuye saete 04.00ine de dest pêkena û dimayê nimajî dest bi karê rojane ma kenê. Hedîye wina vat: "Vernê de baxçeyê xo awe dana. Dima ra awe dana heywananê xo. Dima ra zî verê heywanan dana çêrnayîş. Hîrê hebî mangayê mi estê û mîyanê roje de ez înan şanena. Ez şitê ê mangeyan roşena wesayîtê ke Amed ra yenê. Sewbîna ez bi ê şitî mast, penêr, toraq û rûn zî viraznena. Bi nê karan reyde ez karê keyeyî zî kena. Pakitî û werd viraştî û ûsn. Yanî roja mi wina derbaz bena heta şan de.”

 

Payîzê amadekarîyê zimistanî 

 

Hedîye, dîyar kerd ke payîz de zî dest bi amadekarîyê zimistanî kenê û vat: "Seba zimistanî ma balîcanan wuşk kenê, tirşî viraznenê. Ma zergûnayîyê sey kînger kenê dolabe û wexto ke beno zimistan ma vejenê û wenê. Ma toraq û rûnê xo wedarnenê. Sewbîna ez rîhan û nene zî wuşk kena.  Sewbîna hîro, beybûn û xecxecok zî arêdana û wuşk kena seba zimistanî.”

 

Cîrantî zaf weş a 

 

Hedîye, dîyar kerd ke çiqas kulturê verê zêde nêmendo zî aye wayîrê kulturê dengbêjî vejêna û wina vat: “Wexto ke ez bi cîrananê xo reyde şina verê heywananê xo pîya deyîran vana. Ma bi deyîranê ke vanê reyde govende gênê. Ez maya xo ra xeylêk çîyan musaya. Bi 27 serrî yo ez zewicnaye ya û na dewe de ya. Cîrantîya ma bi dewijan reyde xeylêk weş a. Ma timî têhet de yê.”