Elfazî Toral

 

STENBOL – Avûkata ÇHDyî Yagmur Kavake da zanayîş ke tecrîdê giran yê serê Rayberê PKKyî Abdullah Ocalanî her ke şino giran beno û komelî ser de vila beno û wina vat: “Wexto ke babete bena Abdullah Ocalan CPT û Tirkîya bêveng manenê. Tecrîd bêhuqûqî yo û bêvengîye zî polîtîk a. Vera nê de ganî hîsgerî û têkoşîn bibê.” 

 

Rayberê PKKyî Abdullah Ocalano ke Zîndanê Tîpê Fyî yê Îmraliyî de tepişte yo û zêdeyê 2 serrî yo ke tu xeberêke nîna girewtiş. Muracatê seba pêvînayîşî yê keye û avûkatan zî bi bahaneyê ‘cezaya dîsîplînî’ yenê redkerdiş û tecrîdê Îmraliyî vilayê pêro zîndanan bîyo.

 

Derheqê rewşa Abdullah Ocalanî de sere de Komîteya Vernîgirewtişê Muameleyo Xirab û Îşkenceyî yê Ewropa (CPT) û heme dezgehê mîyanneteweyî bêvengîya xo pawenê.

 

Avukata Komeleya Huqûqnasê Hemdemî (ÇHD) Avûkate Yagmur Kavake derheqê tecrîdê serê Abdullah Ocalanî de ercnayîş kerd. 

 

‘Bi bahaneyê cîya heqê tepişteyan destê înan ra yeno girewtiş’

 

Yagmure da zanayîş ke zîndanê Kurdistan û Tirkîya de xeylê binpaykerdişê heqan yene ciwîyayîş û sere de weşîya bi veşênayîşê înfazan reyde xeylê binpaykerdişê heqan yê giranî vejîyayî raşte. Yagmure dîyar kerd ke pêvînayîşê keye û avûkatan zî yenê astengkerdiş û kişta ci de zî tecrîd esto. Yagmure wina dewam kerd: “Tecrîd problemêk gird o. Tena tecrîdê fîzîkî pê nîno. Heme heqî kesan ra yenê girewtiş û resnayîş yeno sînorkerdiş. No zî beno sebebê binpaykerdişê heqan. Qerarê Desturê Bingeyîn (QDB) û Mehkemaya Heqanê Merdiman a Ewropaye zî vana ke kesêk bi hawayêkê fîzîkî bi sifato ke suc kerdo de beno ke ameyo tepiştiş. La heqê azadîya fikrî dewam kena. Tepişteyêk wayîrê heqê pêvînayîşê bi keye û avûkatan reyde bikero yo. La ma vînenê ke Kurdistan û Tirkîya de binpaykerdişê heqan yenê ciwîyayîş. Heqê pêvînayîşî dest ra yeno girewtiş. Bi bahaneyê cîyayî heqî yenê redkerdiş.”

 

‘Wexto ke babete bena Ocalan bêveng ê’

 

Yagmure dewamê qiseykerdişê xo de dîyar kerd ke Abdullah Ocalano ke Îmraliyî de binê tecrîdêk giran de yo. Yagmure derheqê polîtîkayê zîndanan de zî xeylê çîyan vat û dewam kerd: “Babeta tecrîdî binpaykerdişê heqan ê giranan ra ya. Tu cewabêke seba muracatê avûkatan nîna dayîş. Pênêameyîşê pêvînayîşan binpaykerdişê heqan ê giranan ra yo. Vera qerarê QDByî yo. Wexto ke babete bena Ocalan CPT û Tirkîya bêveng manenê. Vera tecrîdî de bêveng mendiş polîtîk o.”

 

‘Dewlete polîtîkaya binpaykerdişî rayra bena’

 

Yagmure wina qiseykerdişê xo peynî kerd: “Bi aşmano ke tu xebere Ocalanî ra nîna girewtiş. Ma nêzanê weşîya ci kam ci rewşe de ya. Tecrîdê Îmraliyî seba tepişteyanê bînan zî xeylê çî îfade keno. Mesajo ke wazîyeno bidîyo no yo. Dewlete polîtîkaya binpaykerdişî rayra bena. Ganî vera binpaykerdişê heqan ê tepişteyan de her kes sere wedarno. Ganî reaksîyonêk zelal bêro mojnayîş. Ganî vera nê binpaykerdişê heqan de têkoşîn bêro girdkerdiş.”