Fatma Gokhan

 

SILÊMANÎ – Merkezê Hafiza û Cigêrayîş, Arşîv, Kitabxane ya Cinîyê Kurdî yê xeyalê rojnamegere, endama Merkezê Cigêrayîşê Jineolojîye Nagîhan Akarsele bî, abîye. Cinîyê ciwanî yê Almanî ke tewrê akerdişê Merkezê Hafiza û Cigêrayîş, Arşîv, Kitabxane ya Cinîyê Kurdî bîyî wina vatî: “Cinîyê kurdî îlham danê, çike ê tena seba azadîya xo şer nêkenê.”

 

Merkezê Hafiza û Cigêrayîş, Arşîv, Kitabxane ya Cinîyê Kurdî yê xeyalê rojnamegere, endama Merkezê Cigêrayîşê Jineolojîye Nagîhan Akarsele bî, abîye. 4ê Teşrîna Verêne ya 2022yî de rojnamegere, endama Merkezê Cigêrayîşê Jineolojîye Nagîhan Akarsele Silêmanîye ya Başûrê Kurdistanî de ameye qetilkerdiş û seba xeyalê aye Merkezê Hafiza û Cigêrayîş, Arşîv, Kitabxane ya Cinîyê Kurdî abîye. Xeylê cinîyê dinyaye ra 300 ra zêde cinî tewrê akerdişî bîyî. Cinîyan serê nameye Komîteya Jineolojîye ya Almanyayî tewrê akerdişî bîyî û hîssanê xo JINNEWSî rê pare kerd.

‘Cinîyê kurdî seba heme cinîyanê dinya benê îlham’

 

Zina V. Gemeinsam Kampfene da zanayîş ke cinîyê kurdî her kesî rê perspektîfêk pêşkêş kenê û bale ant serê kitabxaneyê ke ame akerdiş ser û wina vat: “Seba ke ez ewro tîya de ya ez zaf kêfweş a û ez tewrê akerdişê na kitabxaneye bîya. Raştî zî ez xeylê kêfweş a. Çike awankerdişê cayo ke cinî xo eşkena tede îfade bikera, heyecanêk gird dano merdimî. Xeylê dezgehê ma yê cigêrayîş û perwerdeyî estê. Sey cinîye fehmkerdişê tarîxî xeylê muhîm o. Seba ke tîya ame awankerdiş ez xeylê kêfweş a. Her ca ra cinî ameyî tîya û kede danê. Gelo do se bikerê? Na babete de ez xeylê heyecanin a. Ma hêvî kenê ke ma zî bibê parçeyê nê çîyî. Cinîyê kurdî seba heme dinya îlham benê. Ma her cayê dinya de nê çîyî vînenê. Xeylê cinî înan ra îlham herînenê. Çike bi raştî zî fikrêk pêşkêşê ma kenê. Hêzêk zêde danê ma. Seba têkoşînê ma yê cinîyanê Almanan û yê dinya hêz danê. Na kedêke gird a.”

'Jineolojî firsendê awankerdişê girêdayîşê ma yê kulturê ma reyde dano ma’

 

Barbara zî qiseykerdişê xo de bale ant serê averşîyayîşê Jineolojî û vejîyayîş ci yê îlhamî ser û vat: “Seba ke ez tîya de ya ez raştî zî xeylê bextewar a. Çike dîyîşê heme cinîyan yê tîya û xilasîya înan a karî xeylê kêfweş o. Jineolojî îlham dano Almanya. Çike metodê zaf cîya pêşkêşê ma keno. Cinî û kitabê uca îlham danê ma. Nê dîmenî ma her tim nêvînenê. Jineolojî firsendê awankerdişê girêdayîşê ma yê kulturê ma reyde dano ma.”

‘Seba azadî û bedilnayîşê raşteyêk o’ 

 

Lunaye dîyar kerd ke akerdişê kitabxaneyî do bibo sebebê gamê bedilnayîşî û wina peynî ard: “Ez xebata serê tarîxê Jineolojî û dîyîşê bi kitabê tîya yê ke nînê zanayîş vera zaf kêfweş bîya û binê tesîrê nê çîyî de menda. No çîyêko efsunî yo. Seba mi cinî û tarîx zaf muhîm ê. No çî no kitabxane de pê yeno. Merdim derheqê tarîxê cinîye de fikirîyeno. Ez sey cinîyêke ke Almanya de ciwîyena nêwazena ke tena hayîya mi Almanya ra biba. Fikre cayê cîyayî yê dinya seba mi muhîm ê. Cinîyê kurdî îlham danê, çike ê tena seba azadîya xo şer nêkenê. Seba azadîye û bedilnayîşî no kitabxane alternatîfêk o. Tîya de cinî eşkenê bêrî têhet û eşkenê derheqê fikir û potansîyelê xo de qisey bikerê. Seba ke ez ewro bîya parçeyêk tîya û seba ke mi şima heminan dî ez xeylê kêfweş a.”