Melîke Aydin

 

ÎZMÎR - Parlametera Partîya Çep a Keske Burcu Gul Çubuke dîyar kerd ke zîrveyê Astanaye ra ver hemsereka Kantonê Qamişloye, hetkara aye û şoforê aye hedef ameybî girewtiş û netîceyê nê hêrişî de Tirkîya nîyetê xo dîyar kerda. Burcuye vat: “Wexto ke cinîyî mekanîzmayê xo awan kenê zî sey tehluke yenê dîyîş.”

 

Hêrişê ke Tirkîya 20ê hezîrane de bi droneyê çekdarî SÎHAye hêrişê Kantonê Qamişloyî kerd. Netîceyê hêrişî de Hemsereka Kantonê Qamişloyî Yusra Derwêş, Hetkara ci Lîman Şîwêş û Firat Tumanî ameybî qetilkerdiş. Parlamentera Partîya Çep a Keske ya Îzmîrî Burcu Gul Çubuke dîyar kerd ke qetlîyam verê maseya çaran a ke Tirkîya, Rusya, Îran û Sûrîye do Astanaye de pê bîyarê pê ame û vat ke bi nê suîkastî reyde Tirkîya nîyetê xo rona raşte. Burcuye vat ke uca de parkerdişê Rojawan û çinîkerdişê kurdan ameyo qiseykerdiş. 

 

‘Verê Astanaye Tirkîya nîyetê xo rona raşte’

 

Burcuye da zanayîş ke Tirkîya hewl dana bi sûîkastan xo Tirkîya de aver biba û wina vat: “Hêrişê Rojawanî verê pêvînayîşê Astaneye pê ame. Çar dewletê ke Astanaye de ameyî têhet derheqê herra Kurdistanî de qerar dayî. Na maseye de heqê Kurdan yê tayînkerdişê qederê xo çin o. Coka ra zî her dewlete hêzê xo serê na maseye de ronaya raşte. Tirkîya bi taybetî bi hêrişanê vera Başur û Rojawanî nîyetê xo ronaya raşte. Bi bombardumanan suîkastan kena.”

 

‘Lozan zî maseyêk winasî bî’

 

Burcuye wina dewam kerd: “Maseya Astanaye de şarê kurdî sey dişmen ameyo dîyîş. Hewl danê şarê kurdî çinî bikerê. Raşte de babeta parkerdişê Kurdistanî esta. La ne temsîlkarê şarê kurdî yê şaranê bînan çin o. Na mase hetê dagirkeran ra ameya ronayîş. Lozan de zî wina bî. Wexto ke nê çîyî kenê zî qirkerdişan ra xo dûrî nêkenê.”

 

‘Ewnîyayîşê Tirkîya ya hemverê cinîye vera nimuneyê Rojawanî yo’ 

 

Burcuye dewamê qiseykerdişê xo de ewnîyayîşê Tirkîya ya hemverê cinîyan, nîşaneyê hemkarîya înan a bi DAIŞî reyde ya. Burcuye nê çîyan ard ziwan: “Hemserekatî demê verênan de zî hetê wezîrê zerreyî ra hedef ame girewtiş. Rojawan de cinîyê ke destê cîhadîstan ra xelisîyayî estê û xo rê dewe awan kerdî. Uca de dewlete wargehan awan nêkena, heqê raydayîşê înan nêpawena. Uca de mekanîzmayê cinîyan estê. Edaletî seba xo rêxistin kenê. Yanî eksê uca yê. Coka ra zî temsîlkarê ci tehluke yenê dîyîş. Fikre înan bi tehluke yeno dîyîş.”

 

‘Bi hêrîşî erce moralê şarî hedef ameyî girewtiş’

 

Burcuye bale ant serê hêrişê ke pê ameyî û vat: “Suîkast bi amancê fînayîşê moralê şarî ame kerdiş. Hewl danê hîssê bêpawitişî awan bikerê. Kobanê de bi rayîrê teknolojîye mesajê tehdîdî dayî şar. Bi taybetî cinîyan rê vanê ke ma eşkenê bidê temsîlkaranê şima ro. Wazenê hêzî bixeripnê. Wazenê şarêk ke xo binê kontrolî de hîs keno awan bikerê. Bi no hawa wazenê deformasyon bikerê.”

 

‘Hewldayîşê cabîyayîşî esto’

 

Burcuye da zanayîş ke dewleta Sûrîye zî hewl dana newe ra Rojawan de ca biba û wina dewam kerd: “Kurdî uca de heqanê xo dest fîna, qederê xo bi xo tayîn kenê. La dewletê ke na rewşe qebul nêkenê estê. Sûrîye bi ca bibo do destkewtişê cinîyan bêro çinîkerdiş. Rojawan de têkoşînê şaran ser kewt. Cîhadîstan hêz vînî kerd. Astana de çar dewletî ameyî têkişt û wazenê serê herra ke aîdê înan nîya de bibê serdest. Astanaye de hêzek ke hemsengîyan bibedilno nêvejîyayo raşte.”

 

Burcuye qiseykerdişê xo yê peyênan de dîyar kerd ke tena şarê kurdî nê, hetê sosyalist û demokratî zî vera nê hêrişan de vatî êdî bes o û wina peynî kerd: “La ewro hêzêk winasî vejîyayo raşte. Ma sey kesê ke têkoşînê şaran pawenê nêeşkenê nê hêzî bivejnê raşte. Ganî babeta ma na biba. Ganî ma rayîrê rêxistinbîyayîşî akerê. Ganî ma prosesê rexneyan de nê çîyî munaqaşa bikerê.”