Elfazî Toral

 

STENBOL – Sereka Komeleya Heqanê Merdiman a Stenbolî Gulseren Yolerî da zanayîş ke wextê neweyî de do xebatê xo dewam bikerê û vat: “Pawitoxê heqê merdiman her şert û mercî de hedreyî ke bixebetê. Komeleya Heqanê Merdiman têkoşînê xo yê 37 serrî de nê bi zelalî dî. Ma do zî na çarçewa de xebatê xo dewam bikerê.” 

 

Sereka Komeleya Heqanê Merdiman a Stenbolî Gulseren Yolerî ya ke 6 serrî yo serekatîya komeleye kena rojanê verênan de 18ê Hezîrane de 19ine kombîyayîşê Heyetê Pêroyî yê Asayî pê ard. Gulserene seba demo newe reyna bîye sereka komeleye.

 

Gulserene derheqê demê verêne, hedefe seba demê vernî, rol û mîsyonê ÎHDyî de JINNEWSî re qisey kerd.

 

‘Ma seba her kesî têkoşîn danê’ 

 

Gulserene da zanayîş ke sey komele şahidîya xeylê binpaykerdişanê heqan kenê û serranê verênan de Tirkîya de bi hawayêkê bêhuqûqî binpaykerdişê heqan û bêhuqûqî yenê ciwîyayîş. Gulserene wina dewam kerd: “Her kesê ke nê welatî de ciwîyenê binpaykerdişê heqan reyde yenê rî bi rî. Ma sey Komeleya Heqanê Merdiman kam beno wa bibo, seba heme kesê ke heqê înan ameyî binpaykerdiş têkoşîn danê. Ma do tîya ra pêy zî seba heqanê merdiman têkoşîn bikerê.”

‘Ma faalîyetê têkoşînî rayra benê’

 

Gulserene vat ke heqê cuye, heqê starbîyayîşî, heqê weşîye, heqê perwerdeyî û heta heqê ekolojîye her raşteyî de seba averberdişê heqê merdiman hewl danê û wina domna: “Komeleya Heqanê Merdiman taqîpkerdişê heme heqê merdiman yê herême kena. Ma xebata xo rayra benê. Komîsyonê zîndanan û komîsyonê kesê ke wextê destbendkerdişî de ameyî vînîkerdiş, xebatan rayra benê. Programê ke ma pê anê têkoşînê vera binpaykerdişê heqan o û pawitişê heqê kesan o.”

 

‘Xebatê ma do tîya ra tepîya zî dewam bikerê’

 

Gulserene da zanayîş ke kombîyayîşê heyetê pêroyî yê neweyî 18ê hezîrane de pê ardê û wina derg kerd:  “Ma heyetê pêroyî yê 19ine pê ard. Îdarekarîya neweyî dîyar bî. Ma wezîfeyê xo pare kerd. Xebatê ma cayê ke mendibî do dewam bikerê. Demo newe de ma do hewldayîşê xo dewam bikerê. Eynî wextî de ma seba demê neweyî bernameyêk xebate amade kenê. Ma do hedefanê xo dîyar bikerê û nê ser de xebata xo dewam bikerê.”

 

Gulserene tewr peyîn wina vat: “Binpaykerdişê ê wextê neweyî de zî de zêde benê. Seba bêhuqûqî û  binpaykerdişê heqan dewam kenê. Nimûne rewşa Dayîkanê Şemeyî. Hîrê qerarê Dadgeha Destura bingehîn ya derheqê Dayîkê Şemeyî de estê. La çi heyf nê qerarê DDByî pê nînê. No zî nêzdîbîyayîşê îqtîdarî mojneno. Ma pawitoxê heqî her şert  û mercî de seba têkoşînî amade yê. Ma do xebatanê xo dewam bikerê.”