RIHA - Emîne û Ferît Şenyaşar yê ke têkoşînê xo yê seba edaletî dewam kenê vatî, "Ma fek waştişê xo yê edaletî vera nêdanê û edaleto ke erey mendo zulm o.”

 

Qezaya Pirsûsê Rihayî de 14ê Hezîrana 2018ine de merdim û pawitoxê parlamenterê AKPyî yê verê Îbrahîm Halîl Yildiz di laj û mêrdeyê Emîne Şenyaşar qetil kerdibî. Hemverê nê de Emîne û lajê xo Ferît Şenyaşaro ke hedîse ra bi birîndarî xelisîyayî 9ê Adara 2021ine de verê Edliyeyê Rihayî de dest bi Nobeta Edaletî kerdibî. Nobeta keyeyî roja 822ine de dewam kena. Keye, seba nêweşîya Emîne Şenyaşare nobeta xo ewro banê xo yê Pirsûsî de dewam kerd. 

 

Keye, serê hesabê xo yê medyaya dijîtale de Wezîrê Edaletî Yilmaz Tunç û Wezaretê Edaletî etîket kerd û nê mesajî pare kerd: "Dayîka min verê Edlîyeyê Rihayî de ya û ez zî Meclîs de ya...Ma fek cigêrayîşê xo yê edaletî ra vera nêdanê. Edaleto ke erey mendo zulm o. Ma nêbenê hemparê zulmî.”