RIHA - Çalakîya "Nobeta Edaletî" 820 rojî yo dewam kena. Emîne Şenyaşar ewro tewrê roniştişê dewaya  bi sebebê “heqaretî” ameya akerdiş bî. Roniştiş taloqê 29ê teşrîna peyêne bî.

 

14ê hezîrana serra 2018ine de merdim û pawitoxê Parlamenterê AKPyî yê Rihayî yê verê Îbrahîm Halîl Yildiz qezaya Pirsûsî ya Rihayî de hêrişê keyeyê Şenyaşarî kerd. Hêriş de mêrde û di lajê Emîne Şenyaşare ameyî qetilkerdiş. Emîne Şenyaşar û lajê aye Ferît Şenyaşar ke qirkerdişî de bi birîndarî xelasîyayî, 9ê adara 2021ine de vernîya Edlîyeyê Rihayî de dest bi Nobeta Edaletî kerdibî. Çalakîya keyeyî roja 820ine de dewam kena. 

 

Emîne Şenyaşare saetê serê sibayî de ameye vernîya Edlîyeyê Rihayî û pêwa avûkatanê xo tewrê roniştişê dewaya bi sebebê “heqaretî” ci rê ameyo  akerdiş bî. Seba qiseykerdişê Emîne Şenyaşar a roja 345ine çalakîye de (16ê sibata 2022yîne), bi îdiayê “heqaret Îbrahîm Halîl Yildizê AKPyîjî kerda” dewa ameye akerdiş. Roniştişê ewilî yê dewa 3ine Dadgeha Cezaya Pêroyî yê Rihayî de ame viraştiş. Emîne Şenyaşar, lajê aye Mehmet Şenyaşar û avûkatê înan roniştiş de amade bî. 

  

Roniştiş, dimayê tespîtkerdişê nasnameyan dest pêkerd. Emîne Şenyaşar da zanayîş ke do pawitişê xo bi kurdî bikera. Dadger, persê seke “Şima zewicnaye yê?” û “Çend tutê şima estê?” Emîne Şenyaşare rê kerd. Emîne zî bi na cewabe reaksîyon hemverê nê persan de da û vat: “Mêrde û di tutê mi qetil kerdî. Waştî yê bînî zî qetil bikerê.” 

 

Dima ra zî Emîne Şenyaşar derheqê tawanbarîyê yenê kerdiş wina vat: “Ez dermanan şuxulnena, lajê mi bi 5 serrî yo hucreyê yewkesî de yeno tepiştiş. Heta ku dermanan nêşuxulînî nêeşkena şewe rakewî. Ser ra xeylêk wext derbaz bî û ê vatişî nînê vîrê mi. La baş yeno vîrê mi ke tutê mi senî ameyê kiştiş. Ez nê tawanbariyan qebûl nêkena.” 

 

Avûkat Hîdayet Enmekî zî vatke zabitnameyo ke bîyo sebebê tehqîqatî hetê polîsanê sivîlan ra ameyo hadrekerdiş û nê çîyan ard ziwan: “Ma wazenê ke raporê kesê pispor ê xoserî bêro amadekerdiş. Mabenê gerreker û miwekîlê mi de dişmenî esto. Ma wazenê ke dewaya ke Meletî de yena dîyîş serê UYAPî ra bêra girewtiş. Merdime miwekîlê mi hetê merdimê gerrekerdoxî ra ameyî kiştiş û birîndarkerdiş. Goreyê ma eke dosya tîya de bêra zêdekerdiş do muhakemekerdiş zî fêde ci ra bigêra. Ma do badê mutalaayî pawitişêk hîra bikerê.” 

 

Mehkema zî waştişê avûkatan esas girewt û seba ke dozger mutalaaya xo amade bikero roniştişê dewaye taloqê 29ê Teşrîna Peyêne kerd.

 

Keyeyê Şenyaşarî badê roniştişî vernîya edlîye û ‘Qoncikê edaletî yê Keyeyê Şenyaşar’î de dest bo nöobete kerd. Nobeta Edaletî ya keyeyî 820 roje yo ke dewam kena.

 

Ercayeyê vîrardişî yo ke 9ê adara 2021î de Nobeta Edaletî de dest pêkerd û heta ewro bi eynî bahaneyan derheqê Emîne Şenyaşare de 31 tehqîqatî ameyî akerdiş. Nê tehqîqatan ra 10ê ci açarîyayî dewa.