Semra Turan

 

MERKEZÊ XEBERAN- Çapemenîya terefgire hedîseyê wesayîtê zirxî ke Kurdistan de tutan rê yenê qelibnayîş û qetil kenê, ziwanê ke tutan sûcdar keno xeberan de şuxulnena. Gelo do çapemenîya terefgire key fek nê nêzdîbîyayîşî ra vera bido û rastîya bivîna, bida eşnawitiş.

 

Geverê Colemêrgî de 7ê Hezîrane de çawîşê pisporî yê bi nameyê A.K.P yo Fermandariya Cendermeyan ê Geverî de wezîfedar o, bi wesayîtê xo tutê 5 serre Erdem Aşkanî rê dabi piro û qetil kerdibi. Şikdaro ke cayê hedîse ra rema dima ra ame destbendkerdiş. Şikdar tena rojêke destbend mend û bi şertê kontrolê edlî serbest ame veradayîş. Zabitnameyê tespîtî yê cayê hedîse ame girewtiş de tuto 5 serre Erdem Aşkan bi ‘qusur’ ame vînayîş.

 

Muhakamekerdiş çin o

 

Merdişê netîceyê pirodayîşê wesayîtî hêzê asayîşî Kurdistan de bîyo rastîyêke. Wareyêk ke tutî ci de kay kenê, serê rayîrî de kuçeyan de wesayîtî bi lez derbaz benê û hemverê tutê ke vejênê vernîya înan lazimî bi hêdîbîyayîşî zî nêvînenê. Şubeyê ÎHDyî yê Amedî dîyar kerd ke 15 serrê peyîn de netîceyê pirodayîşê wesayîtê zirxî de 21 ci ra tutî 44 kesî dinyaya xo bedelnayî. Kesê ke nê wesayîtan şuxulnenê zî sey wesayîtê zirxî ê zî nînê muhakemekerdiş, ne zî wezîfera yenê girewtiş. Nê dir zî sînordar nêmanenê şarî bi çekê xo tehdîd kenê.

 

Wesayîtê zirxî hende bi lez şinê ça?

 

Gelo her kuçeyê Kurdistanî de no helwestê bêperwa yê hêzê asayîşî ke bi wesayîtê xo kuçe de gêrenê û beno sebebê cuya merdiman, kamî ra bawer kenê. Wesayîtê zirxî yê ke kuçeyan de gêrenê seba çi uca de gêrenê û wina bi lez şinê ça? Çira hende wesayîtê zirxî kuçeyan de gêrenê? Wezîfeyê înan çi yo? Cewabê nê persan şerê lêşîn ke 40 serrî yo Kurdistan de yeno rayraberdiş de nimite yo. Nê şerî bi seyan kesî canê înan ra kerd û warê înan ra kerd. Nika zî kuçeyan de yew bi yew tutan hedef gênê. Kurdistano ke heqê kayê tutan bi destê polîs û leşkeran yeno xespkerdiş, bedelê nê kayan zî canê înan o.

 

Çapemenî nêeşnawena, nêvînena

 

Bîyayîşê tutanê kurdan ke bi canê xo bedel danê zî sucdar yenê hesibnayîş. Nê kesê ke înan qetil kenê, tutê ke bedel danê sûcdar yenê hesibnayîş. Gelo demo ke hukm zî serê nê qetilkerdişan padana, leşker û polîsê ke nê wesayîtan şuxulnenê veradanê kuçeyan, çapemenî se kena? Çapemenîya Azad bi serê nê cînayetan de şina, bi dinya dana eşnawitiş.  Çapemenîya terefgire zî bi yew vatişêke zî ca nêdana nê qetilkerdişan. Seke nê tutî qet nêciwîyayê, qet nêameyê qetilkerdiş têgêrenê. Seba înan tu manaya tutanê kurdan çin a. Çapemenîya ke şîdetê polîsê Fransayî vînena, Kurdistan de qetilkerdişê tutan nêvînena, nêeşnawena.

 

Wa kuçeyan de kay nêkerê!

 

Kurdistan de tutbîyayîş seba dozger, dadger, walî, qeymeqam tu çîyêk îfade nêkeno, çapemenî zî edeletê terefgir de cayê xo vînena. Tutî bi yew destî  bi qisûr yenê vînayîş. Çapemenîya terefgire seba tutanê kurdan vana ‘wa ê zî kuçeyan de kay nêkerê’ û bajarê rojawanî seba ke tutî raşteyê kayî nêvînenê xebera ‘tena parkêk esto o zî yeno rijnayîş’ viraznenê.