Mîdye Miqted

 

ŞEHBA - Cinîyê Şehbayî hemverê hêrişê dewleta tirke û ablûqakerdişê Şehbayî yê hetê Hukumetê Şamî ra reaksîyonê xo mojnayî û vatî: "Şehba bi gonîya kêna û ciwananê ma çeteyan ra ameya xelaskerdiş. Ma fek na herre ra vera nêdanê. Heta ma anêgêrê serê herra welatê xo Efrînî, ma do fek têkoşînê xo ra vera nêdê."

 

Dewleta tirke hêrişê xo yê bi çekê giran û teyareyan bi ser welatîyê Efrîn û Şehba de dano dewamkerdiş. Welatijê herêma Efrînî binê şert û mercê tewr giran de xo ver danê. Hêvîya înan aya ke agêrê Efrîn. Hem dewleta tirke hêriş kena, hem zî hetê Hukmatê Şamî ra Şehba yena ablûqakerdiş. Hemverê hêriş û ambargoyî têkoşînê welatijê Şehba dewam keno. Hemverê hêrişan de cinîyê Şehbayî reaksîyon mojnayî û mesajê dewamîyê têkoşînî dayî. 

 

‘Wa dewleta tirke serê herra ma vejîyo’

 

Zeyneb Husêna ke yew koçbera Efrînî ya wina reaksîyon mojna: "Ma sey koçberê Efrînî bi 5 serrî yo serê herra xo de xo ver danê. Hukmatê Şamî ma kerdo binê ablûqa. Hetêk ra zî Tirkîya hêriş kena. Hemverê hêrişê dewleta tirke ya îşxalkere de dinya bêveng a. Ma qey wijdan çin o? Dewleta tirke bi heme dewletan reyde bîya yew. Ma înan pêrûnan  şermezar kenê. Wa dewleta tirke serê herra ma ra xo bianca.”

 

‘Efrîn ê ma yo, ê îşxalkeran nîyo’

 

Henîfa Hemdoş zî ajansê ma rê qisey kerd û wina vat: "Ma seba na rewşe hêrîş û şerê hetê dewleta tirke ya îşxalkere ke dewam kena, nêweş kewtî û tutê ma yenê kiştiş. Labelê ma tîya xo ver danê. Seba agêrayîşê bi rûmet ê serê herra ma, herra Efrînî têkoşînê ma dewam keno. Efrîn ê ma yo, ê îşxalkeran nîyo. Hemverê dewleta tirke ya îşxalkere û çeteyan ma pey lajan û kênayanê xo de yê.”

 

‘Ma gamanê xo peyser nêancenê’

 

Serê eynî babete de Endama Meclîsê Keyeyê Şehîdan ê Efrîn-Şehbaye Emel Qehreman ajansê ma rê qisey kerd û wina vat: “Amancê dewleta tirke hedefgirewtişê şarê ma yê Şehba yo. Wazenê tersêk bikerê zerrîya welatîyan û reyke bîn înan bido koçberkerdiş. La ma sey cinî û şarê kurdî teslîmîyet tesdîq nêkenê û gamanê xo peyser nêancenê.”

 

‘Ma wazenê ke hemverê hêrişan bendêk bêro ronayîş’

 

Emele dewamê qiseykerdişê xo de reaksîyon vera hêrişan mojna û vat: "Venga ma pêro dewletan û rêxistinanê merdiman rê esta ke hemverê kerdişê dewleta tirke bêveng memanê. Ma ewro herra xo rayra benê. No zî seba dewleta tirke bîyo ters. Çira nê pêro rêxistinî, dewletî û sazgehê heqê merdiman bêveng mendê? Ma wazenê ke hemverê nê hêriş û kerdişan bendêk bêro dayîş. Seba ke pêro kerdişî suc ê û hesabê nînan bêro dayîş.”

 

‘Lazim o xoverdayîşê ma dewam bikero’

 

Emele tewr peyîn wina vat: "Lazim o xoverdayîşê ma dewam bikero, seba dewleta tirke bi heme şerê xo yê bi çekan û bi şerê xo yê serdî wazena şarê ma binpay bikera, bipelçiqna. Ma zî tu wext fek herra xo ra vera nêdanê û ma paşte înan de yê.”