Şehrîban Aslan 

 

AMED - Rojnamegere Safîye Alagaşa ke bi serrêke yo zîndan de ya û 2 rojî verê ameye veradayîş wina vat: "Ma do nêheqîyê na herême bi xurtî binusê. Ma do bibê vengê rojnamegeran, cinîyan, tutan û xozaye. Eke ma bibê vengêk xurrt do komel zî xurt bibo."

 

Yewin roniştişê dewaya derheqê Mudûra Karê Nuşteyî ya JINNEWSî Safîye Alagaş ke çarçewaya cipersayîşê Serdozgerîya Komare ya Amedî, 16ê hezîrana 2022yîne de amebî tepiştiş, 5ine Dadgeha Cezaya Girane ya Amedî, 15ê hezîrane de ame vînayîş. Dadgehe qerarê tehlîyeyê Safîye da û roniştiş taloq kerd. Safîye ke serrêke zîndanê ci de mendêne ameye veradayîş û bale ant serê tedayê çapemenîya azade.

 

‘Verê zî hemverê çapemenî de teda estbî'

 

Safîye, dîyar kerd ke hemverê rojnamegeran de tedayêk zaf bi şîdet esto û wina vat: "Teda û operasyonê ke hemverê rojnamegeran de pê ameyî bi ma reyde dest pênêkerd, hemverê rojnamegerê kurdî de bi serran o teda û zordarî estê. Tehdît, qetilkerdiş, sirgun, teda, astengkerdişê kar, padayîşê sazgeh û dezgehan û desteserkerdişê hacetan, bi serran o dewam keno.  Tirkîya de tena hemverê çapemenîya kurdî, hemverê çapemenîya muxalîf zî teda û zordarî esto. Medyaya terefgire nika binê banê îqtîdarî de xebityena û medyayêke îtîatkar a. Merdim eşkeno vajo ke Tirkîya de medya bîya di parçe. Verê raşte de her kes zanayîne do weşanêk senîn bikero û ciyakerî nêkerdêne. Pîya xebitîyayîne û pîya têgêrayîne.  Ruhê paştdayîşî vilayê merkezan zî bîne. Labelê nika ware de eynî paştdayîş çin o. Seba ke êdî fikr û fehmê cîya nîna têhet." 

 

‘Qezayêke bîne ra dozgerî ardî'

 

Safîye wina bale ant serê amancê destbendkerdiş û tepiştişan: "Vatêne ganî şima bêveng bibê û rastîyan nêvajê. Seba je vernîya tepiştişê ma, prosesêk cidî estbî û hemverê kurdan de operasyonî estbî. Şirnex û Colemêrg de qirkerdişê daran estbî û eynî cayî de operasyonê leşkerî estbî. Ma zî nê çîyan teşhîr kerd. No bi sebebê bêzarîya înan û hemverê Çapemenîya Azad a Kurdî de operasyonêk dayî destpêkerdiş. Ez wazena nê çî bi xususî vajî; destbendkerdişê ma bi talîmatê taybet ê Suleyman Soylu pê ame. Edlîyeyê Amedî de dozgerî çinbî ke dosyayê ma rê biewno. Kesêk nêwaştêne dosya ra biewnîyo. Seba ke dosya ma pîl kerdî ke dozger û huqûqnasî zî zanê ke muhtewayê dosyayan veng ê. Şî qezayêke bîn dozgerî ardî û no dozger qerarê tepiştişî da. No dozger dima ra ame terfîkerdiş. Dozgerî vernî de vat,  propaganda û dima ra zî kerd endamtiya rêxistine û dima ra qerarê tepiştişî da. Wexto ke merdim ewnîyeno merdim vîneno ke bêhuqûqîyêk senîn pîl werte de yo."

 

‘Bêvengî hemkarî ya' 

 

Safîye, dîyar kerd ke îdîaname 400 rîpelan ra pê ameyîne û heme zî xeberan ra pê ameyîne û wina vat: "Xeberê ke ameyê weşênayîş, arşîvê xeberan, weşanê ke ajansê ma xeberî girewtê, dosya de amebî bicakerdiş. Bi taybetî zî xeberê derheqê tecrîdî de dosya de amebî bicakerdiş. Dîyarbi ke xeberê derheqê tecrîdê hemverê Rayberê PKKyî Abdullah Ocalanî ra aciz bî. Nuşteyê ma yê tecrîdî zî bîne sebebê 'endamtiya rêxistine'. Labelê rojnamegerî nuşteyê çîyo ke nîno cesaretkerdiş a. Xebera Halîse Aksoy zî sey sûc ameye vînayîş. Zulmo tewr pîl ke hemverê dayîkêke pê ameyo zî şirawitişê esteyan ê bi kargoyî yo. Gelo kamî nê çî nuşt?  Medyaya kurdî nuşt. Serê na cografya de heqaret rumetê merdimayî yeno kerdiş û nê zulmê tewr pîl ê. Eke ti zulm nêsûnê, ti zî bena hemkarê nê zulmî. Bêvengî hemkarî ya. Xeylêk nimûneyê bi nê rengî estê. Dosya de manîpulasyonêk pîl estbî. Çîyê ke ma nuştê pêro rast ê û somut ê."

 

‘Heqîqet nîno nimitiş'

 

Safîye, dîyar kerd ke wazenê rastîyan biniminê û wina vat: "Dimayê operasyonî zî embazê ma karê xo ra dewam kerdî. Hemverê nê reyke bîn operasyonêk bîn kerdî. Waştî sereyê rojnamegeran bitewênê, xora reya ewil nêbi. Peyserêk xurt yê çapemenîya kurdî esto. Her şert û mercan de xo ver dana û nuştişê xo dewam kena. Qelema rojnamegeran erd de nêmanena û serê na cografya de seba ke kurdî çîyêk nênuştî xeylêk çî ciwîyayî. Xeylêk çî estê ke nêameyê nuştiş û nê çî zerrîya tutîya ma de mend. Rojnamegerê ke nika xebityenê serranê 80 û 90 rarojnamegerî kenê. Nê rojnamegerî şahidîya nê serran kerdê. Hîn demî seba ke îmkan çinbî, nêameyê nuştiş. Ma nika nêwazenê eynî çî tutê nikayî biciwîyê. Ma wazenê vengê her kesî bêro eşnawitiş. Ez bawer kena ke ma nêkerê zî kesê ke bikerê estê, seba ke heqîqet nîno nimitiş."

 

‘Taqîbkerdişê 24 saetan' 

 

Safîye, qiseykerdişê xo de wina bale ant serê Zîndanê Cinîyan ê Amedî: "Zere de şert û mercî xeylêk giran ê. Cayê cuya ma de kamerayî ameyî bicakerdiş. Nê cayî de heqê tepişteyan yeno binpaykerdiş, la kesêk agahdar nîyo. Zîndan de îzolasyonêk pîl esto û tecrîdêk esto. Lê rayaumumî agahdar nîyo. Ti nêeşkena spor bikerê, nêeşkena embazanê xo yê tepişteyan bivînê. Tenê di kursî estê ê zî bi israrê ma ameyî akerdiş. No kurs zî tenê ti eşkena embaza xo ya koguşe reyde şêrê. Wexto ke ti korîdoran ra derbaz bena, ti nêeşkena embazê bînan reyde têkilî ronê. Odayan de kamera estê. Nê kamerayî bi sereyê xo ma tacîz kenê. Wezaretê Edaletî 24 saetan nê odayan taqîb keno. No bi sereyê xo şîdet û tacîzê psîkolojî yo. Sebebê ronayîşê kamerayan zî şîdetê mabêne tepişteyan yeno mojnayîş. Labelê çîyêk wina çin o. Seba ke koguşê ma yê sîyasî yê. Problemo tewr pîl zî nêweşxane yo. Ti nêeşkena şêrê û wexto ke ti şêrê zî bi kelepçeyan şina. Embazêke ma krîzê qelbî derbaz kerd la ambulanse dimayê 40 deqayan ameye. Beno ke ma embaza ma dinyaya xo bibedelnayîne. Ez venga pêro pawitoxê heqê merdiman kena ke zîndanan de derheqê binpaykerdişê heqan de cigêrayîş bikerê. Bi taybetî zî seba Zîndanê Cinîyan ê Amedî. Ganî seba cigêrayîşî israr bikerê."

 

‘Rojnamegerî eynika komelî yê'

 

Safîye, dîyar kerd do rojnamegerî dewam bikera û wina qedêna: "Wexto ke mi dest bi meslegê xo kerd, ez zaf bi kelecan bîye û ez nika zî eynî kelecanî ciwîyena. Seba ez meslegê xo nêkerî ez xeylêk reyan ameya destbendkerdiş û tepiştiş. Eke ti Tirkîya de karê xo kena, ti terefgir nêbê ti yena destbendkerdiş û tepiştiş. La ganî bêro zanayîş ke ma do tewr bi hêz bixebitîyê û vengê xo vejê. Ma do nêheqîyan qebûl nêkerê ke serê na cografya de yenê ciwîyayîş, bi xurtî binusê. Ma do bibê vengê rojnamegeran, cinîyan, tutan û xoza. Eke ma bibê vengêk komel zî do bi hêz bibo. Ma reyke bîn dî ke ajansê xeberan ê cinîyan çiqas muhîm o. Bi hêz, bawerî û bi ruhê têkoşînî ma do dewam bikerê."