MERKEZÊ XEBERAN - TJK-Fyî, derheqê 6ine Festîvala Cinîyanê Kurdan ke do 18ê hezîrane de bêro organîzekerdiş, venga tewrbîyayîşî kerd. 

 

Tevgerê Cinîyanê Kurdan ê Fransayî (TJK) derheqê Festîvala Cinîyanê Kurdan eşkerayîyêke nuşteyî weşan kerd.

 

Eşkerayîye de no çî ame vatiş: “10 serrî verê hîrê cinîyê şorişgêrî yê kurdî Sakîne Cansiz, Fîdan Dogan û Leyla Şaylemez ameyî qetilkerdiş. 23yê kanûnê de zî hunermend Mîr Perwer, Abdurahman Kizil û Emîne Kara (Evîn Goyî) ameyî qetilkerdiş. Ma 10 serrî yo têkoşînê heqîqet û edaletî rayra benê. Yew parçeyê nê têkoşînê ma zî Festîvalê Cinîyan ê Fîdan Dogane yo. Ma emser nê festîvalê xo dîyarîya Evîn Goyî ya ke Parîs de amebî qetilkerdiş, kerd.

 

Do festîvala ma ya emser 18ê Hezîrane de bi sloganê ‘Jin, jiyan, azadî’ Raşteyê Stalîngradî de bêro kerdiş. Ma venga pêro cinîyan kenê ke bi hawayêkê xurt tewrê nê festîvalî bibê.