Melîke Aydin

 

ÎZMÎR - Avûkate Turkan Aslan Agaç da zanayîş ke seba kesê dimayê qetilkerdişê Denîz Poyraz nêrê vînayîş, hewldayîşêk xususî yeno dayîş û vat, xeylêk  delîlî vînîbîyayeyê û dewa hema nêqedîyaya.

 

17ê hezîrana 2021î de hêrişê vera bînaya Rêxistina Partîya Demokratîke ya Şaran (HDP) ya Îzmîrî de Denîz Poyraze amebî qetilkerdiş. Di serrî yo ke hêzê peynîya qetlîyamî nêvejîyayo raşte. Kiştox Onur Gencerî ameybî muhakemekerdiş û roniştişê 6ine de qerar ameybî dayîş. Mehkema sucê ‘bi plankerde kes kiştiş’ de cezaya muebetî, sucê ‘zirar dayo malî’ ra 4 serrî, sucê ‘binpaykerdişê destnêdayîşê awanîye’ ra 2 serrî, sucê ‘muxalefetê qanûnê çekan’ ra 3 serrî ceza dabî.

 

Kiştoxî qirkerdişî ra dima hesabê xo yê whatsappî ra fotografê Denîz Poyraze vila kerd. Fotografanê Gencerî yê ke hesabê ci yê instagramî de vila bîyê eşkera kerd ke Gencer hetê dewleta tirke ra ameyo perwerdekerdiş û erşawîyayo Sûrîye. Kiştox Onur Gencerî 18 saetî ra dima amebî destbenderdiş û badê israrê avûkatê Denîze xeylê delîlî ameyî arêdayîş. 

 

Avûkatê dewaye ra yew zî Turkan Aslan Agaçe ya. Turkane da zanayîş ke seba hêzê pey qetlîyamî bivejî raşte hewldayîşê taybet estê û pêvînayîşê kiştoxî yê ke têkilîya ci û MHPyî, komeleyê ulkucuyan tesdîq kena nêkerdî dosya. Turkane da zanayîş ke dosya mehkemaya îstînafî ra usule ra agêrayo û dewa dewam kena.

 

‘Qestî nêame cigêrayîşkerdiş’

 

Turkane da zanayîş ke prosesê cipersayîş û muhakemekerdişî yewbînan ra xoser nîyê û kiştox 18 saetî ra dima ameyo destbendkerdiş û dozger bê delîlêk ke arê bido îdîaname hadre kerdo û bi waştişê înan delîl ameyî arêdayîş. Turkane wina dewam kerd: “Waştişê ma hema wina pê ameyî. Prosesê muhakemekerdişî zî girêdayeyê nê ame rayraberdiş. 7 roniştiş pê ameyî. Ma mecbur mende ke bi heyetê mehkema reyde bikewê rewşêke têmîyan. Heqê mexduran çinî yeno hesibnayîş. Dimayê bedilnayîşê heyetê mehkema heqê mexduran reyna ame wedaritiş. Prosesê cipersayîşî senî dest pêkerd yê muhakemekerdişî zî wina dewam kerd.”

 

‘Dimayê eşkerayî hêriş pê ame’

 

Turkane dîyar kerd ke roniştişê 14ê Teşrîna Verêne û 27ê kanûne de tena kiştox û avûkatê ci tewrê ci bîyî û vat: “Raybazê muhakemekerdişê adilane ame binpaykerdiş. Seba kesê pey hedîseyî bivejê raştê hewldayîşêk taybet estbî. Vîdeoyê gulana 2021î ke Sedat Peker weşanabî de ame vatiş ke do hemverê kurd û elewîyan de hêriş pê bêrê û bi no hawa wazenê şarî bifînî raşteyan û dormeyêk kaotik awan bikerî. Dimayê nê vatişan hêriş pê ame.”

 

‘Kiştox qetlîyam bi kamî da tesdîqkerdiş’

 

Turkane da zanayîş ke vîdeoyê rojnameger Cevherî Guven ke teberê Tirkîya de ciwîyeno zî de yeno vatiş ke kiştox Onur Gencer nuşteyê serê whatsabî de bi kesê merkezî reyde qisey kerdo û çalakî bi nê kesî dayo tesdîqkerdiş. Turkane vat ke înan ra dima waştî ke Cevherî Guven bêro goşdarîkerdiş la pêvînayîşê whatsab û dayeyê dîjîtalî yew zî dosya de çin ê.”

 

‘Kesêk sifatê şikin de nêame goşdarîkerdiş’

 

Turkane dewamê qiseykerdişê xo de vat ke kesê ke sifatê şikin de ganî biameyêne goşdarîkerdiş sey şahid ameyî goşdarîkerdiş, nê kesî nêameyî muhakemekerdiş û domna: “Eke îmkanê ma bibayêne do no kes sey şikin biameyêne goşdarîkerdiş. Yanî heme delîlî nêameyî arêdayîş û hetê mehkema û dozgerîye ra nêameyî ercnayîş. Yê ke Denîze qetil kerd û suîkastê Sînan Ateşî pê ard eynî çî ra miqate benê. Ma wina fikirîyenê. Nê profîlî hemkarîya komê cîhadîst û ulkucuyan ra wayîr kenê. Roniştişê yewine de eke proseso ke raştî û heqîqetî vejeno raşte baş biameyêne rayraberdiş do edalet zî pê biameyêne. Qetlîyam sîyasî yo û çarçeweya nefretî de pê ameyo. Ziwanê nefretî ameyêne awankerdiş. O wext wezîrê karê zerreyî Suleyman Soylu HDPyî hedef girewtêne. Ma waşt ke Suleyman Soylu zî bêro muhakemekerdiş.”

 

Dewa dewam kena

 

Turkane qiseykerdişê xo yê peyênan de zî vat ke proses hetê înan ra nêqedîyayo û wina peynî ard: “27ê kanûna 2022yî de qerar ame dayîş. Ma zî îstînaf kerd. Dosya şirawîya Edlîyeya Herêmî ya Îzmîrî. La hewtyo verên de kêmanîyê usulî ra qerar ame xerepnayîş û ma musayî ke dosya şirawîyayo 6ine Mehkemaya Cezaya Girane ya Îzmîrî. Cigêrayîşê ma dewam keno.”