ÎZMÎR - Fehîme Poyraze diyîne serrgêra qetilkerdişê Denîz Poyraze de venga tewrbîyayîşê yadkerdişê kênaya xo kerd û vat ke Denîze tena kênaya aye nê kênaya şarî ya.

 

17ê hezîrana 2021î de kiştox Onur Gencerî hêrişê awanîya Partîya Demokratîke ya Şaran (HDP) ya Îzmîrî kerdbî û Denîz Poyraze qetil kerdbî. Di serrî yo ke hema zî peynîya qetilkerdişî nêvejîyayo raşte. Kiştox Onur Gencer ameybî muhakemekerdiş û roniştişê 6ine de seba ci qerar ameybî dayîş. Mehkema sucê ‘bi plankerde kes kiştiş’ de cezaya muebetî, sucê ‘zirar dayo malî’ ra 4 serrî, sucê ‘binpaykerdişê destnêdayîşê awanîye’ ra 2 serrî, sucê ‘muxalefetê qanûnê çekan’ ra 3 serrî ceza dabî. Dayîka Denîze, Fehîme Poyraze  diyîne serrgêra qetilkerdişê Denîze de qisey kerd û vat ke do vera bêedaletîye de têkoşînê xo dewam bikera û vat ke şarê kurdî hetê aştîye de yo.

 

‘Ma zanê kam peynîya kiştişî de yo’

 

Fehîmeye da zanayîş ke kiştox Onur Gencer bi tena sereyê xo nêeşkeno bikewo awanîya HDPyî û vat: “Kiştox cesaret hêzê peynîya xo ra gêno. Hêzê xurtî peynîya ci de yê û ey şirawitî uca û Denîze qetil kerd. Eke cesaret nêgirewtêne o nêeşkayîne bikero. Kiştox şî perwerde girewt. Seba çi perwerde girewt. Seba qetilkerdişê kurdan perwerde girewt. Cinîyê kurdî û kurdan qetil kenê. Ma nê çîyî qebul nêkenê. Cinî qetilkerdişî heq nêkenê. Ma zanê kam peynîya kiştişî de yo.”

 

‘Goreyê xo mehkema kenê’ 

 

Fehîmeye bale ant sere têgêrayîşê kiştoxî yê mehkema û wina vat: “Vatêne mi Denîz Poyraze qetil kerd û xo sey lehengî vînayêne. La o keso ke ameybî şuxulnayîş bî. Ez do têkoşînê xo dewam bikera. Muhakemekerdişê peynî Şakran de virazîya. Ma nêgirewtî zerre. Bi gazê îsotî hêrişê ma kerdî. Her çî kerdî. Aye mehkema de se bî ma nêzanî. Goreyê xo mehkema kerdî. Tu malumatêk ma çin o.”

 

‘Cinî û tutî hedef de yê’ 

 

Fehîmeye dîyar kerd ke bi taybetî Kurdistan de cinî û tutî hetê leşker û polîsan ra hedef yenê girewtiş û wina vat: “Ma nêwazenê kes bêro qetilkerdiş. Ma aştîye wazenê. Ma vanê aştî, ê vanê şer. Ma do her tim bi hesretê tutanê xo biciwîyê. Ewro tuta mi ameya qetilkerdiş, beno ke siba zî tay kesanê bînan bêrê qetilkerdiş. Çîyê ke qewimîyenê girêdayeyê problemê kurdî yo. Ganî no problem bêro çareserkerdiş. Do rojêke qebul bikerê. Ganî bibê yew û nê problemî çareser bikerê. Kesebaya dayîkan vêşena. Her roje cenaze yenê. Heta kêy do wina bibo? Ma şer nêwazenê.” 

 

‘Ganî tepişteyê nêweşî bêrê veradayîş’ 

 

Fehîme sewbîna bale ant serê rewşa tepişteyanê nêweşan û vat, ganî lezabez tepişteyê nêweşî bêrê veradayîş û wina vat: “Yê ke yenê tahliyekerdiş dimayê demêk dinyaya xo bedelnenê. Pêro kesî bîyê nîm merdim. Merdimî 20-25 serre yenê tepiştiş û 50-60 serrî de vejênê. 30 serrî zîndan de manenê. Ma nê qebûl nêkenê.”

 

Seba yadkerdişê Denîze vengdayîş

 

Fehîme peynîya qiseykerdişê xo de wina vat: “Denîze ameye qetilkerdiş. Waştişê mi oyo ke serebûtê wina nêrê normalkerdiş. Bi di serrî yo Denîze şehîd bîye. Ma tu wext aye xo vîr ra nêkenê. No serebût nîno xovîrrakerdiş. Wa dayîkî êdî nêbermê. Ez pêro kesî dawetê yadkerdişê Denîze yê 17 hezîranr de yeno kerdiş, kena. Roja şemeyî yadkerdişê aye esto. Roja yewşeme mewludê aye esto. Wa her kes verê ma de bibo. Wa wayîrê dewaya Denîze vejîyê. Ma wayîrê xo vejîyê. Denîze tenê kênaya mi nîya, kênaya şarî ya.”