Sema Çaglak

 

ŞIRNEX - Cemîle Acara ke keyeyê aye Kampa Mexmûrî de yo da zanayîş ke serê Mexmûrî de planê lêşinî yenê kerdiş û venga wayîrvejîyayîşê Mexmûrî kerd.

 

Serranê peyênan de hem artêşa tirk û hem zî ya Iraqî bi hawayêkê sîstematîk hêrişê Kampa Mexmûrî kenê. Bi hezaran kurdî serranê 90an de tedaya dewlete vera koç kerdî Mexmûrî û kedêk gird Mexmûrî açarnayî raşteyê cuye. 20ê gulane de Artêşa Iraqî waşt ke bi wesayîtanê zirxî û hûmarêk gird ê leşkeran Kampa Multecîyan a Şehîd Rûstem Cûdîyî (Mexmûr) bi kinitişê xendekan, lefnayîşê têlan û kuleyan bigîrê binê abluqa. La şarê kampe hemverê nê hewldayîşê abluqakerdişî de vejîya û xoverdayîşê înan 16 rojan dewam kerd û ser kewtî. La tehlukeyê sere kampe hema zî dewam keno.

 

Derheqê babete de Cemîla Acare qisey kerd û hetê rewşa Mexmûrî de ercnayîş kerd.

 

Cemîle Acare (65) dewa Spîndarûkî ya quntarê Koyê Cûdîye ra ya. Keyeyê Cemîle serra 90î de netîceyê hêrişê dewleta tirke de verê xo da başurê Kurdistanî û nika Kampa Mexmûrî de manenê. Cemîleya ke keyeyê xo ra dûrî tena sereyê xo qezaya Cizîrî ya Şirnexî de ciwîyena û reaksîyon mojnaye hêrişê vera Mexmûrî. Cemîleye da zanayîş ke şarê Mexmûrî mecburî ra û zilm vera ca û wareyanê xo terikna, Mexmûr de mîyanê şert û mercanê zehmetinan de seba xo raşteyê cuye awan kerd û vat: “Destpêkerdişê serra 90î de hem Şirnex û qezayanê ci de û hem zî Sêrt û qezayanê ci de zilmêk gird şarê Botanî ser de pê ardî. Bi hezaran kurdî zilm vera herême ra ameyî koçkerdiş û nika Kampa Mexmûrî de manenê. Keyeyê mi heme şî Mexmûr, ez û birazaya xo tena tîya de mendî. Birazaya mi zî serra 90î de ameye tepiştiş û 36 serrî cezaya zîndanî aye rê ameye birnayîş.”

 

‘Zilm ra remayî, zilmî reyde rî bi rî mendî’

 

Cemîleye dewamê qiseykerdişê xo de qala wextê koçkerdişî kerd û vat: “A serran de qorîcîyê hetê qezaya Qileban, Sêgirk û Dêrgûlîyî dormeyê dewe girewtî. Seba vengkerdişê dewe 24 saet dayî. Heto bîn de pezê ma veşênayî û keyeyê ma talan kerdî. Şew û roje vengê îşkenceyî ameyêne. Aye rewşe de ma xo bi zorî destê înan ra xelisna û ma derbazê Silopî bîyî. Silopî de zî rehet nêverdayî. Ma tay şîyî dewa Xinisî. Dima ra şarê ma şî Başûr û nika Kampa Mexmûrî de manenê. Şarê ma zilm vera rema la na rey zî zilmê sere înan nêqedîya û dewam keno.” 

 

‘Vera yewbînankiştişî de vejîya’

 

Cemîleye bale ant kerdişê PDKyî ser û ard ziwan ke birayê aye hetê PDKyî ra ameyo vînîkerdiş û aqûbetê ci hema zî dîyar nîyo. Cemîleye wina dewam kerd: “Peynîya serra 90î de reyna kiştiş estbî. O wext xeylê kurdî hemverê yewbînankiştişê kurdan de vejîyayî û xover dayî. Birayê mi zî vera yewbînankiştişî vejîya û Mexmûrî ra ame vere PDKyî de nêrazîbîyayîşê kurdan ê vera yewbînankiştişî bîyaro ziwan. La hetê PDKyî ra ame tepiştiş û 2 rojan zîndanê Akrê de ame tepiştiş. Dima ra birayê mi het PDKyî ra ame vînîkerdiş. Ma xeylê birayê xo gêrayî la ma hema zî aqûbetê ci nêzanê.”

 

‘Wayîrê Mexmûrî bivejêne’

 

Cemîleye dîyar kerd ke Mexmûr de planê lêşinî estî û bale ant Qirkerdişê Helepçe ke xeylê kesî Başûr ra koçê Vakurî bîyî ser û vat: “O wext şaro ke tewr zêde hetkarîya PDKyî û pêşmergeyan kerd şarê Mexmûrî bî. La yê ke nika tewr zêde zilm kenê reyna PDK û Tirkîya ya. Wazenê Mexmûrî veng bikerê. Hetê zilmê serê Mexmûrî de destê Tirkîya heme pêkerdişan de esta. Şarê Mexmûrî xeylê zehmetî anceno û şertê zehmetinan mîyan de xover dano. No şar xeylê reyan bêdoktor yeno verdayîş û problemê weşîye ciwîyenê. Ganî şarê ma Mexmûrî tena nêverdo. Mexmûr parçeyêk ma yo. Seba erc û bîyayîşê xo ganî wayîrê Mexmûrî bivejîyo.”