Rabîa Onver

 

COLEMÊRG - Qezaya Geverî ya Colemêrgî de Erdem Aşkano 5 serre binê wesayîtê aîdê çawişê pispor A.K.P.yî  de mend û dinyaya xo bedilna. Versuc bi şertê kontrolê edlî serbest ame veradayîş. Avûkatê dosyayî Omer Faruk Aşkanî dîyar kerd ke çawişê pispor bîyo sebebê kiştişê Erdemî û ganî bêro tepiştiş.

 

Erdem Aşkano 5 serre qezaya Geverî ya Colemêrgî de 7ê hezîrane de Cadeyê Îpekyoluyî de binê wesayîtê aîdê çawişê pispor A.K.P.yî ke Cendirmeyê Qezaye ra vejîyabî de mend û dinyaya xo bedilnaye. Şoforê wesayîtî A.K.P.yî dimayê qezayî cayê hedîse ra rema. Erdem cayê hedîseyî de dinyaya xo bedilna û versuc zî badê demêk hetê polîsan ra ame destbendkerdiş. Çawişê pispor dimayê rojêk ke destbendkerde mend bi şertê kontrolê edlî serbest ame verdayîş. Heto bîn de zabitnameyo ke cayê qewimîyayîşî de ame girewtiş de zî Erdem sey sucdar yeno dîyîş.

 

Avûkatê dosyayî Omer Farûk Aşkanî derheqê babete de ajansê ma rê qisey kerd.

 

Omerî destpêkerdişê qiseykerdişê xo de bale ant roja qewimîyayîşî ser û vat: “Erdem seba ke wesayît pît ameyêne binê wesayît de mend û Erdem 50 metre ancîya. Dimayê qîrayîşê dayîke hemwelatijî resayî cayê qewimîyayîşî. Heto bîn de çend dayîkî versucî rê vanê ‘Lajê ma bibe nêweşxane’ zî goş nêdano. Hemwelatijî cayê qewimayîşî de reaksiyon mojnenê versucî, hemverê reaksîyonan de A.K.P.yî destê xo erzeno çeka xo û hemwelatijan tehdît keno. Dimayê demêk çawişê pispor weyşeno wesayîtê xo, wazeno ke cayê qewimîyayîşî ra biremo la hemwelatijî bi kerrayan waştî ke wesayît bivindarnê. Vera hewldayîşan versuc cayê qewimîyayîşî ra remeno. Dima ra şino teslîmê qereqolî beno. Versuco ke ame destbendkerdiş sewqê Mudirîya Emnîyetî ya Qezaye yeno kerdiş. Erdemo 5 serre zî cayê qewimîyayîşî de dinyaya xo bedilneno.” 

 

Omerî da zanayîş ke versuc bi şertê kontrolê edlî serbest ame verdayîş û wina dewam kerd: “Cayê qewimîyayîşî de cigêrayîş dîya dest pêkerdiş. Netîceyê cigêrayîşî de Erdem sey sucdar yeno mojnayîş. Wexto ke merdim ewnîyeno raporê ke ameyî girewtiş, merdim vîneno ke raporêk hetgir o û xoser nîyo. Xeylê sucê versucî estê la nînê dîyîş. Nê semedî ra ma venga komîsyonê ke heqanê tutan pawenê kenê û venga partîyê sîyasî kenê ke wayîrê dewa bivejê. Tîya de tutî dinyaya xo bedilnenê. Kesê ke wayîrê wijdanî ganî kişta ma de bê.”

 

Omerî qiseykerdişê xo yê peyênan de dîyar kerd ke kesê sucdar çawişê pispor o û wina qedêna: “Wexto ke ma cayê qewimîyayîşî de cigêrayîş kerd ma dî ke tut nê çawişê pispor sucdar o. Çike sere rayîrî de rêçe frenî çin o û tut mesafeyêk zaf derg de ancîyayo. No çî raştî mojneno. Ma do kişta keyeyan de bibê. Ma vînenê ke wezîfedarê dewlete qezayê trafik û tay hedîseyanê bînan de dewlete danê vernîya xo.”