MERKEZÊ XEBERAN - Dimayê ke hêzê rejîmê Îranî, bajarê Seqizî kerdî binê ablûqa, şarê Seqizî seba  protestokerdişê rayîrê bi amancê şîyayîşê serê gorê Jîna Emînî asteng keno yeno viraştiş, bi grevê pêroyî protesto kerdî. 

 

Şaredarî seba ke şîyayîşê şarî yê serê gorê Jîna Emînî yê Goristanê Ayçiyî asteng bikero, projeyê rayîrî da destpêkerdiş. Ame zanayîş ke şaredarî wazeno rayîrê goristanî pado û parkê goristanî zî werte ra wedarno. Dimayê ke şar nê plansazî rê agahdar bi, projeyê bi padayîşê berê dikanan û qerarê grevê pêroyî protesto kerd. 

 

Eynî wextî de leşkeran vernîya mitîngo ke plansaziyê ci ameyîne kerdiş, bajarê Seqizî kerd binê ablûqa. Hêzê rejîmî heme rayîrê ke şinê şaredarî padayî û trafîk serê nê rayîran de da vindarnayîş. Nê ser de  dikandaran seba ke paştdayîş bidê keyeyan, grevê pêroyî dayî destpêkerdiş.