RIHA - Nobeta Edaletî ya keyeyê Şenyaşarî roja 812ine de dewam kena. Keyeyî serê hesabê xo yê medyaya dijîtale de nê mesajî pare kerd: “Heta ke edalet nêro ma keyeyê xo de nênişnenê ro.”

 

Çalakîya Nobeta Edaletî ya keyeyê Şenyaşarî ke 9ê adara 2021ine de verê Edlîyeyê Rihayî de dayo destpêkerdiş roja 812ine de dewam kena. Emîne Şenyaşar û lajê xo yê nobete gênê, seba şî pêvînayîşê akerde yê Fadil Şenyaşaro ke 5 serrî yo hucreyê yew kesî de Zîndanê Xarpêtî de yeno tepiştiş, nêameyî verê berê Edlîyeyê Rihayî. 

 

Keyeyî serê hesabê xo yê medyaya dîjîtale de nê mesajî pare kerd: “Seba ke ma do şêrê serdayîşê Fadil Şenyaşaro ke vernîya 5 serran bi hawayêkê birîndar nêweşxane de ame destbendkerdiş û hucreyê yew kesî yê Zîndanê Xarpêtî de yeno tepiştiş, ma do verê berê edlîye de nêbê. Heta ke edalet nêro ma keyeyê xo de nênişnenê ro.”