Elfazî Toral

 

STENBOL- Endama Heyetê Rayîrberîya TTByî Dr. Ayşe Ugurluye da zanayîş ke bi tecrîdê serê tepişteyan wazenê îradeya tepişteyan bişikinê û vat: “Çîyê ke zîndanan de pê yenê, yew zî caardişê ke hewl danê komelî dizayn bikerê yo. Ez heme merdiman ra wazena ke hîssin têbigêrê. Ganî ma bi hawayêk xo biresnê tepişteyê pey beran.”

 

Rayberê PKKyî Abdullah Ocalan 24 serrî yo Girawa Îmraliyî de binê tecrîdo giran de yeno tepiştiş. Tecrîd û komployê hemverê Ocalanî 24 serrî yo dewam keno. 25ê Adara 2021î ra nata 27 aşmî yo ke ci ra xebere nîna girewtiş. Tecrîdê Îmraliyî heme zîndanan zî vila bîyo.

 

Tecrîdê zîndanan bi polîtîkayê sey veşênayîşê înfazan, dermannêkerdişê tepişteyê nêweşan û xeylê çîyê bînî roj bi roje hîna giran benê. Şertê tecrîdî vera rewşa tepişteyê nêweşî her ke şina zehmetin bena.

 

Mergê bişikin û tecrîd

 

Serranê peyênan de rewşa tepişteyê nêweşî her ke şî hîna giran bî û Dezgehê Tipê Edlî (ATK) raporê ‘eşkeno/a tepişte bimano/a’ dano tepişteyê nêweşî yê giran û terke mergî keno. Heto bîn de bi polîtîkaya tecrîdî reyde bi hezaran tepişteyî îşkence, şîdet û zextî reyde zî rî bi rî manenê. Serranê peyênan de tepişteyê ke îşkence û zext vînenê bi şikin dinyaya xo bedilnenê û derheqê rewşe de tu hewldayîş çin o.

Endama Heyetê Rayîrberî ya Yewîya Tabîbanê Tirkan (TTB) Dr. Ayşe Ugurluye derheqê polîtîkayê tecrîdo giran ê zîndanan de qisey kerd.

 

Caardişê serê tepişteyê nêweşî

 

Ayşeye bale ant zîndananê Tirkîya ser û vat ke problemê tewr gird tecrîd o. Ayşeye dewamê qiseykerdişê xo de wina vat: “Amacê tecrîdî no yo ke îradeyê tepişteyan bişikinê. Bi tecrîdî reyde hewl danê tepişteyan xo gore şekil bikerê. Tepişteyê nêweşî yê giran estê. Vera raporê weşîye yê ‘nêeşkeno/a zîndan de bimano/a’, şirawenê ATKyan. Tepişteyê nêweşî bajarê ke ci de yê bajarêk ra bene yewna bajarî yê dûrî. No zî seba tepişteyê nêweşî rewşêk giran a. Tepişteyê ke nêweşîyê înan yê kronîkî estê wesayîtê rîngî de zor û zehmetîyan ancenê. Raştî zî no hetê wijdanî de raşt nîyo. Xeylê tepişteyî nê prosesî de bado ke ameyî tehlîyekerdiş dinyaya xo bedilnayî.”

 

Venga hîssgerîye

 

Ayşeye tewr peynî vat ke ganî înfazê tepişteyanê nêweşan nêro veşênayîş û tepişteyî xo biresnê heqê weşîye û wina qedêna: “Ma zanê ke no polîtîk o. Ma rêxistinê heq û meslekî wazenê ke cezayan bi hawayêk merdimîye biancê. Ma sey TTByî vera veşênayîşê înfazî de xeylê eşkerayîyan da. Ma nê caardişan raşt nêvînenê. Ma venga hîssgerîye bi heme pawitoxê heqê merdiman kenê. Ma wazenê ke ma hîssgerîye zêde bikerê û biresnê cayanê eleqedaran. Serranê peyênan de zîndanê newe ameyî akerdiş. Zîndanan de prosesêk başbîyayîşî çin o. Her tim teda babeta vatişî ya. Ganî heme kes serê heqê merdiman de hîssgerîya xo zêde bikero û xo biresno tepişteyê pey beran.”