Rojda Aydin

 

AMED - Tepişteya nêweşe Besîye Ozera ke 27 serrî yo tepişte ya, pêwa nêweşîyanê xo, muracatê keye û avûkatan zî serbest nîna veradayîş. Waya aye Zeynep Ozere, ard ziwan ke tepişteyê nêweşî bi merdişî reyde rî bi rî ameyê verdayîş.

 

Zîndanê Kurdistan û Tirkîya de her roje binpaykerdişê heqan yenê ciwîyayîş, rewşa tepişteyanê nêweşan zî giran bena. Muracatê keye û avûkatanê nêweşan ke yeno kerdiş, hetê Sazgehê Înfazî yê Zîndanî ra bênetîce yeno verdayîş, yan î yenê redkerdiş. Seba ke derheqê tepişteyê nêweşan de tu game nîna eştiş, tepişteyî bi mergî reyde rî bi rî manenê. Tepişteyê ke mîyanê nê lîsteyê nêweşan de ca gênê yew ci ra zî Besîye Ozer a.

 

Ma no hewte zî qalê cuya Besîye Ozera ke 27 serrî yo tepişte ya û nika zî Zîndanê Padeye yê Cinîyan Gebzeyî de yena tepiştiş, bigirî dest.  

 

Leşkerî Licê veşnenê

 

Besîye Ozer, serra 1977ine de qezaya xoverdayîşî ya Liceyê Amedî de mîyanê keyeyêk welatperwer de yena dinya. Besîye ke tutîya aye Licê de derbaz bî, emrê xo yê qijî de teda û zilmê dewlete nas kena. Serra 1993ine de leşkerê ke erzenê serê Licê de keyeyê înan veşnenê, Besîye û keyeyê aye zî mecbûr manenê ke koçê Amedî bibê. Seba ke Besîye Licê de mekteb wendêne, reyke bîn agêra Licê û fek herra xo ra vera nêda. Besîye ke uca de mekteb wendêne, eynî wextî de mîyanê xebatê partîye de zî ca gêna. Serra 1995ine de seba zilmê dewlete waya aye Jiyan Ozer tewrê PKKyî bena û dimayê aşmêke Besîye zî tewrê PKKyî bena. Sewbîna zilmê ke serê keyeyê aye de peynî nêbeno, waya aye Nagihan Ozera ke o wext 16 serrî bena yena tepiştiş û 10 serran zîndan de manena. Besîye seba birîndar bena dimayê 6 aşmî reyke agêrena Amed. Tedawîya aye ke keye de ameyîne kerdiş, dimayê serra 1996ine de serê îxbarê îtîrafkerêk erzîyeno serê keyeyî û yena destbendkerdiş.

 

Derheqê Besîye de ke dewa yena akerdiş, 36 serrî cezaya girankerde yena dayîş. Besîye ke zîndananê sey; Amed û Midyatî de mende, nika zî Zîndanê Padeye yê Cinîyan ê  Gebzeyî de yena tepiştiş. Besîye dimayê ke ameye tepiştiş, nêweşîyê sey anemî ke tesîrê qelbî keno, nêweşîyêke bîne zî demarê mezgê aye de tengbîyayîş virazîyeno. Eynî wextî de seba nêweşîya aye ya mîyomî estbî, emelîyat bî. Seba veradayîşê Besîye, muracatê avûkat û keyeyî yenê redkerdiş.  

 

Waya Besîye, Zeynep Ozer derheqê waya xo de qisey kerd.

Sirgûnê zîndanan yena kerdiş

 

Zeynepe, destpêk de dîyar kerd ke vera ke waya aye rê 12 serrî ceza biameyîne birnayîş, bêedaletî 36 serrî ceza ci rê ameye birnayîş. Zeynepe, da zanayîş ke Besîye destpêk de zîndanê Amedî de menda û dima ra aye sirgûnê zîndanê Midyatî ameya kerdiş û wina vat: "Serra 2012ine de kewtî grevê vêşanîye. Dimayê grevê vêşanîye aye û embazê aye sirgûnê zîndanê Gebzeyî ameyî kerdiş. Waya mi bi 11 serrî yo Zîndanê Padaye yê Cinîyan ê Gebzeyî de yena tepiştiş."

 

‘Merdimêke xeylêk zerrîgerm a'

 

Zeynepe, dewam de wina vat: “Waya mi cayê xo de nêvindertêne, her tim şuxulyayîne û wendêne. Her tim bi embazanê xo reyde bî û gêrayîne. Xeylêk zerrîgerm a. Embazanê xo ra hes kerdêne. Merdimêke zaf hetkar a. Embazê aye ke tehlîye benê yenê qalê aye kenê û vanê Besîye hem hetê psîkolojî de û hem zî hetê menewî de hetkarîya ma kerdêne.”

 

Dimayê ke ameye tepiştiş nêweşîyê aye vejîyayî

 

Zeynepe vat heta ke nêtepişyabî qalê nêweşî nêkerdêne û wina dewam kerd: “Anemîyê aye xeylêk o  û anemî zî tesîrê qelbê aye keno. Demarê mezgê aye de tengbîyayîş esto û no çî tesîrêk pîl keno. Sewbîna nêweşîya aye yê miyomî zî estbî û emelîyat bî. Dimayê emelîyatî Besîye xeylêk tengasî ciwîya. Seba astengîyê zîndanî tedawîya aye ame vindertiş. Seba nê ma nika nêzanê nêweşîya aye kam ci sewîye de ya. Na nêweşîya miyomî zî zîndan de vejîya. Îdarekarê zîndanî her tim înan nêbenê nêweşxane. Ganî înan berê verê doktoranê pisporan la tena benê verê doktorê zîndanî. Tedawîya înan yena astengkerdiş. Ganî ê werdê xo bi hawayêk bêasteng biwerê û werdê înan baş bê. La zîndan nê çî asteng keno. Hetê werdî de zîndan de xeylê kêmî esto. dike. Eke Besê zere de tevgerdar nêbîne do rewşa aye tewr xirab bîne."

 

Muracatê keyeyî ameyî redkerdiş

 

Zeynepe, dewamê qiseykerdişê xo de vat ke seba tehlîyekerdişê waya xo xeylêk muracatê îdareyê zîndanî rê kerd. Labelê pêro muracatê ma ameyî redkerdiş. Tepişteyê ma bi mergî reyde rî bi rî verdenê. Seba ke zîndan xeylêk dûr o, ma nêeşkenê her tim şêrê. Seba ke îmkanê ma çin ê. Ma ancax serre ra reyke yan zî di rey şinê. Waştişê ma oyo ke edalet seba tepişteyanê sîyasîyan rê bêro. Ma wazenê ganî pêro tepişteyê nêweşî bêrê veradayîş. Ma aştîyêke bi rûmet û cuyêka arame wazenê."