Melîke Aydin

 

ÎZMÎR - Tehlîyeya Hatîce Calihane ya ke Zîndanê Cinîyan yê Şakranî de tepişte ya bêbahane 8 aşman ameye taloqkerdiş. Dadîya Hatîceye, Zeynep Calihane da zanayîş ke binpaykerdişê heqan yê zîndanan her kesî eleqeder keno û venga hîsgerîye rayaumûmîye rê kerd.

 

Tepişte Hatîce Calihana ke Zîndanê Cinîyan yê Şakranî tepişteya wexto ke cezaya aye qedîyena û ganî bêra tehliyekerdiş 8 aşman tehlîyeya aye yena dergkerdiş. Hatîce vejenê vernîya Heyetê Îdarî yê Zîndanî. Dadîya Hatîceye, Zeynep Calihane 3ê gulane seba roja tehlîyekerdişê kênaya xo şî Îzmîr la da zanayîş ke bê bahane aye rê vatî ke tepiştişê kênaya to do dewam bikero û heqê telefonê kênaya to zî ameyo astengkerdiş. Dadîye venga hîsgerîye rayaumûmî rê kerd. 

 

‘Bi bahaneyê asayîşî malumat nêdayî keye’

 

Hatîce serra 2010î de bi bahaneyê faalîyetê Rêxistina Ciwanan a Partîya Herêmê Demokratîke (DBP) de ca gêna û bi sucdarîya ciwanê KCDyî de ca gêna 6 aşman ameye tepiştiş. Bado ke dosya ame akerdiş, sucdarîya endamtîya ciwanê KCDyî ra ameye muhakemekerdiş û di dosyayan ra pêro pîya 13 serrî ceza aye rê ameye waştiş. 3yê gulane de prosesê tehlîyeyê Hatîceye temam bî la serbest nêameye verdayîş. Dadîya aye Zeynebe vera heme nêweşîyan şî Îzmîr. Zeynebe wina vat: “Ma hêvî kerdêne ke bêra tehlîyekerdiş. Ma 5 deqeyan telefon de qisey kerd. Vat ke dayê hema dîyar nîyo û ma do saet 16.00î de bigêrî. La ameye astengkerdiş. Ma saet 00.00î de saetanê şewe de zîndanî gêrayî. La malumat nêdayî.”

 

‘Heqê telefonî ame astengkerdiş’

 

Zeynebe bale ant astengkerdişê heqê telefonî ser û wina dewam kerd: “Ma 5ê gulane de şîyî pêvînayîşê Hatîceye. Kênaya mi vat ke kaxid nêameyo, tena bi vatişî vatî ke 8 aşmananê bînan ti do tepişte bimana. Mi dozgerê zîndanî rê vat ke ceza qedîyaya la şima serbest nêverdenê. Mi vat şima qey malumat nêda ma. Nêvetî heyet ver. Kaxidêk nêşirawitî. Qanûn çin o. Qanûnan tena seba ma ca anê. Ma nê caardişan qebul nêkenê. Bê bahane înfaz ame veşênayîş.”

 

Ganî her kes veng bivejno

 

Zeynebe qiseykerdişê xo yê peyênan de venga keyeyê tepişteyan kerd ke tutanê xo tena nêverdê û vat: “No wezîfeyê her kesî yo. Beno ke rojêk bêro sereyê înan zî. Zîndanan de bi hezaran kesî estê. Vatî ke qedîyayo. No neheqîyêk gird o. Ganî her kes vengê xo berz bikero.”