Zelal Tunç 

 

WAN - Hemsereka TUHAY-DERî Edîbe Babûr û rayîrbera komeleye Sosîn Oktaye bale antî tecrîdê hemverê Rayberê PKKyî Abdullah Ocalanî ser û vatî: “Rojeva ma ya yewine do biba tecrîd û ma do vera polîtîkaya tecrîdî de têkoşînê xo gird bikerê.”

 

Komeleya Hetkarîya bi Keyeyê Tepişteyan û Hukmweran reyde (TUHAY-DER) serê binpaykerdişê heqan û problemê zîndanan de xebatan rayra bena. Komele 3ine kongreyê xo yê asayî 3yê gulane de Wan de pê ard û rayîrberîya xo ya newe eşkera kerd. Edîbe Babûre kongre de reyna bî hemsereka komeleye. Rayîrbera komeleye Sosin Oktay û Edîbe Babûre derheqê xebatê komeleye yê prosesê newe û tecrîdî de ajansê ma rê qisey kerd.

 

Edîbe Babûre qiseykerdişê xo de bale ant weçînayîşo vîyarte ser û vat ke înan weçînayîş de raşteyan de xebate rayra berdî û wina domna: “Sere de Rayberê PKKyî Abdullah Ocalan û heme tepişteyê sîyasî zîndanan de bi polîtîkaya tecîrîdî reyde rî bi rî mendî. Na polîtîkaya tecrîdî rojeva ma ya yewine bî. Kurdistan bi netîceyê weçînayîşî mesajêk da îqtîdarê AKP-MHPyî. Kurdistan vat ‘Ma nê zilmî qebul nêkenê’.”

 

Hemverê şarî de tecrîd 

 

Edîbeye dîyar kerd ke tecrîd sey polîtîkayêk hem hemverê Abdullah Ocalanî de 5 serrî yo bi giranî yeno rayraberdiş û hem zî hemverê tepişteyanê sîyasî û şarî de yeno rayraberdiş û wina dewam kerd: “Bi xorîkerdişê tecrîdî wazenê îradeyê kurdî bigîrê dest. Seba ke ma û keyeyê tepişteyan çîyo tewr muhîm caardişê berpirsîyarîye yo. Ma do vera tecrîdî de xo bi rêxistin bikerê.” 

 

'Ganî pêvînayîş bi avûkatan reyde pê bêro’

 

Edîbeye dewamê qiseykerdişê xo de qala bedilnayîşê kabîneyî zî kerd û vat: “Tay kurdî bîyî wezîr û no çî seba şarê kurdî ti manayêke nêgêno. Eke îqtîdar hetê domnayîşê tacrîdî de israr bikero, ma do zî têkoşînê xo yê vera tecrîdî de israr bikerê. Ma gamêke tepîya nêerzenê. 28 serrî yo ke hemverê Birêz Abdullah Ocalanî de tecrîdêk giran esto. Eke her tepişteyêk Birêz Abdullah Ocalan zî ganî bi keye û avûkatanê xo reyde pêvînayîş pê bîyaro û no heq heqê merdimîye yo. Fikr û felsefeyê Birêz Ocalanî vilayê pêroyê dinya bî, la Tirkîya de yeno tecrîdkerdiş. Ma qetî tecrîdî qebul nêkenê.” 

 

'Rewşa tepişteyan giran bena'

 

Rayîrberîya TUHAY-DERî ra Sosin Oktaye zî dîyar kerd ke zextê dewlete yê serê keyeyan serranê 90an ra nata dewam keno. Sosine da zanayîş ke birayê Halîl Aslanî serra 1991î de aşma gulane de ra nata Xîzanê Bedlîsî de tepişte yo û wina vat: “Wexto ke birayê mi ame tepiştiş bi giranî birîndar bî û 45 rojan ame îşkencekerdiş. Dimayê tepiştişî zî sere de sirgunê Bedlîsî û dima ra zî sirgunê Zîndanê Amedî kerdî. Birayê mi yo ke 29 serrî ra zêde yo zîndan de yo de xeylê nêweşîyî estê. Xeylê cayê bedenê ci de hema zî parçeyê şarapnelî estê. Lajê wistewreyê mi Seyît Oktay zî Zîndanê Trabzonî de yo. Seyît Oktayo ke 6 serrî yo zîndan de yo, nuştox o. Seba çîyê ke nuşto yeno muhakemekerdiş. Nêweş o, la zîndan de nîno dermankerdiş.”

 

‘Ti hêviyê mi netîceyê weçînayîşî yê sexte ra çin o!’ 

 

Sosine ard ziwan ke rewşa weşîye ya tepişteyê ke bi serran sirgunê zîndananê cîyayan bîyî resaya sewîyeyêka giran û vat: “Keyeyê ma bedelê giranan da. Ti hêviyê mi netîceyê weçînayîşî yê sexte ra çin o. Ma pêro zanî ke do no zext dewam bikero. Ma ra yew hetêk de, ma hirê hetê bînan de yê. Reyna dîyarkerê weçînayîşî kurdî bî. Ez vana; ez kurd a, Homa mi wina viraşto. Qey şima heqê ma zî nêdanê? Kurdbîyayîşî ra vîşêr guneyê ma çin o.”

 

‘Qet fek têkoşînî ra vera nêdanê!’

 

Sosine qiseykerdişê xo wina qedênaye: “Ma do qet fek têkoşînê xo ra vera nêdê. Her hetî de bedelê ma estê. Kurdê xonasî qet têkoşînî ra fek vera nêdanê. Binê her darêk de, her zinarêk, her kerrayêk de erce ma û her zîndanêk de bedelê ma estê. Eke ma vîrî bikerê do ma çinî bihesibnê. Keremê xo ra nê çîyî vîrî mekerê û fek têkoşînê xo ra vera medê.”