ANQARA - Hemvervatoxa Partîya Çep a Keske Çîgdem Kiliçgun Uçare kombîyayîşê Meclîsê Cinîye de qisey kerd û vat: “Meclîs de ame dîyîş ke ganî ma têkoşînêk zaf xurt rayra bibî. Netîceyê weçînayîşî de se ra 50 kesê ke îqtîdarî rê vatî nê, paştîdayîşê têkoşînê heqdar ê cinîye kerd.”

 

Meclîsê Cinîyan ê Partîya Demokratîke ya Şaran (HDP) û Partîya Keskan û Ameyoxî (Partîya Çep a Keske) seba ke ercnayîşê weçînayîşî û seba dîyarkerdişê xeta têkoşînê polîtîkî yê serdemê newe kom bîyî. Hemvervatoxa Partîya Çep a Keske Çîgdem Kiliçgun Uçare qiseykerdişê akerdişî yê kombîyayîşî de kerd.

 

Hemvervatoxa Partîya Çep a Keske Çîgdem Kiliçgun Uçar kombîyayîş de qisey kerd. Çîgdeme destpêk de kesê ke 5ê hezîrana 2015î de hêrişê Amedî de qetil bîyê yad kerdî. 

 

Qiseykerdişê Çîgdeme wina yo:

 

“Ez destpêk de kesê ke 5ê hezîrana 2015î de hêrişê Amedî de qetil bîyê yad kena. Nizdîyê 400 embazê ma birîndar bîyî. Ma vera hêrişan de têkoşînê xo dewam kenî.

 

Ma weçînayîşê parlemento û serekkomarîye xo pey de vera da. Elbet xebata ma ya Meclîsê Cinîyan ê Çepe yê Kesk û Meclîsê Cinîyan ê HDPyî de rayberêk ma estbî. Ma ronayîş, qiseykerdiş û têkoşînê xo de amacê girdkerdişê têkoşînê cinîye da û xebata ma ya ameyoxî zî nê esasan ser de dewam kena. Rayîrê weçînayîşî de ma tewr zêde têkoşînê vera îqtîdarîya AKP-MHP û rejîmê yew camêrdî hetê polîtîkaya cinîye de munaqaşa kerd. Ma zanê ke serdemê neweyî de bi polîtîkaya kolonyalîst û bi tîfaqê dişmenîye ke serê ci de ameybî zêdekerdiş hewl danî xetêka nwe biancî. La seke ma vat, yê tewr muhîm seba ma no yo ke ewro zî sey vizêr hewl danî destkewtişê cinîye verik bikerî.

 

AKP weçînayîşan de heme destkewtişê cinîyan hedef gêno. Bi wesîleya têkoşînê Partîya Çep a Kesk û HDPyî 29 parlementerê cinî vejîyayî û ma temsîlîyetê seyyewbînan û temsîlîyetê tewr xurt ê cinîyan dest fîna. Wekîlê ma yê cinîyî yê ma ra ver û hem zî meclîs de hetê têkoşînê cinîye de bi hawayêk tewr xurt xebetîyenê. Prosesê neweyî de ma do têkoşînê meclîs û raşteyan bipawî. Wexto ke AKP ver bi weçînayîşî de şino dest bi hedefgirewtişê heme destkewtişê cinîyan keno. peymana Stenbolî ra ancîyayîş, destronayîşê ameyoxê cinî û domanan bi beyannatê îstîsmarî, qanûnê 6284 kerdî babeta bazarîya weçînayîşî. Destronayîşê heqê nefeqeyî û xorîkerdişê vatişê nefretî bî. Dest nê çîyî ra vera nêdayî. Bi tîfaqê xo hewl dayî bin ê çîyî xurt bikerî.

 

Têkoşîno ke cinîyan kerd weçînayîşan ra dima zî do serkêşîya ma bikero. Netîceya weçînayîşan de bi têkoşînê Partîya Çep a Keske û HDPyî ma 29 wekîlê cinîyî şawitî MEclîsî û heqê temsîlîya têdûşte û temsîlkarîya tewr xurte viste destî. Wekîlanê ma yê cinîyan têkoşînê cinîyan de hem kuçeyan hem zî Meclîs de bi hawayêkê xurtî karî kerdî. Ma soz danê înan ke do hem parlamento hem zî kuçeyan bi xurtî bipawê. 

 

Têkoşînê cinîyan wayîrê rayîrêkê dergî yo. Vera hêrişanê AKP-MHPyî yê serê cinîyan û şîdetê dewlete-camêrdî têkoşînê ma do dewam bikero.

Ma netîceyanê weçînayîşî sey binkewtişêkî nêercnenê; çunke serkewtişê têkoşînê cinîyan pê weçînayîşan nêno ercnayene. Ma vizêr zî tîya de bîyê, ewro zî tîya de yê. Ganî ma têkoşînê xo xurtêr û pîlêr bikerê. 

 

Ma reyna pêro embazanê xo yê cinîyan rê têkoşînê înan de serkewtişî wazenê. Ma do pîya ser bikewê. Kuçeyî ê ma yê, têkoşîn zî ê ma yo.”