Şehrîban Aslan

 

RIHA - Parlamentera Partîya Çep a Keske ya Rihaye Dîlan Kunt Ayane da zanayîş ke îqtîdarî wazeno destkewtişê cinîyan raşte ra wedarno û vat ke wezîfeyê înan yê nika no yo ke îqtîdarî 28ê Gulane de bişirawî.

 

Parlamentera Partîya Çep a Keske ya Rihaye Dîlan Kunt Ayane 4 parlamenterê ke weçînayîşê 14ê Gulane de bajar de ameyî weçînitiş ra yew a. Dîlane derheqê problemê bajarî de qisey kerd û dîyar kerd ke îqtîdar Riha de polîtîkayê serê cinîyan bi hawayêk giran rayra beno û seyyewbînanî raşte ra wedarito.

 

Hêzê Partîya Çep a Keske 

 

Dîlane vat ke Riha bîyayîşê xo yê feodali paweno, bi wesîleya Leyla Guven û Ayçe Gokkae bedilnayîş pê ame û wina domna: “La êdî rejîmê yew camêrdî nîno waştiş. Ma Partîya Çep a Keske senî blokê AKP-MHPyî vindarna, ma do 28ê Gulane de zî bierşawî. Hedefa înan turê yewine de serkewtiş bî. La ser nêkewtî. Sebebê binkewtişê înan zî Partîya Çep a Keske bî. Bi hêzê Partîya Çep a Keske ê ser nêkewtî.”

 

‘Hemverê xo de cinîyê xoverdayoxî dîyî’

 

Dîlane bale ant xoverdayîşê cinîyan ser û vat ke bê paştîdayîşê cinîyan AKP nêeşkeno ser bikewo û domna: “AKP nê çîyî fehm kerd. Dî ke hêzê cinîyan seba înan tehlukeyêk gird o. Çimkî cinîyî îqtîdarî lerznenê. Coka ra îqtîdar hêrişê destkewtişê cinîyan kerd. La vernîya xo de cinîyanê xoverdayoxan dî. Îqtîdar zano ke cinîya xurt komelo xurt o. Xebata weçînayîşî zî nê esasan ser de ameye awankerdiş. No weçînayîşê di camêrdan nîyo. Beno ke ma tercîhê xo hetê kesêk bikerî la amacê ma tîya de no yo ke ma nê îqtîdarê 21 serrî bişirawî.”

 

‘Wazenê cinîyan çinî bikerî’

 

Dîlane qiseykerdişê xo de bale ant serê polîtîkaya îqtîdarî ya hemverê Kurdistanî ser û vat: “AKP nêwazeno tu cayêk dinya de cinîyan bivîno. Nêwazeno cinî raşteyan de biba. Yewine amacê no bî ke ma bloke faşîst bişirawî. Tena AKP-MHP nê, hedefê ma no yo ke ma vatişê Huda Par û Yenîden Refahî raşte ra wedarnî. Ma serî hîssê olî propagandaya înan vînenê. Ma reyna vanê ke kurd komelêk misliman o û bawermend o. ma no zî pawenê. Ma azadîya ol û wijdanî pawenê. La nê kesî destkewtişê cinîyan şuxulnenê û hewl dane ke cinîyan çinî bikerê. Seba Rihaye ma eşkenê nê çîyan vajî. Binê nameye pereyê domanan û ciewnayîşî de pere yeno dayîş. Ma şîyî kam ca ma vat xora ganî nê çîyî bêrî kerdiş. No dîyarîya AKPyî nîyo. Nê çîyî çîyê ke çîyê ke bêrî kerdiş ra yo. Riha de zî sey her cayî hewl yeno dayîş ke cinî bêra hepskerdiş. Nizdîyê 2 mîlyon nifusê Rihaye esto. Wêranşar ke 300 hezar nifusê ci esto û Sêwregî ke 100 hezar nifusê ci esto de stargehêk çinî yo. Tena Riha de stargehêk girêdayeyê ŞONIMî esto.”

 

Venga serê sindoqan 

 

Dîlane qiseykerdişê xo yê peyênan de zî qala turê diyînî yê weçînayîşê serekomarî ke do 28ê Gulane de pê bêro, kerd û qedêna: “Ganî ma rejîmê yew camêrdî birijnî. Ma 14ê Gulane de da vindarnayîş, ma do 28ê Gulane de zî bişirawî. Ganî her kes şêro serê sindoqan û raya xo bierzo.”