ŞIRNEX - Tuta 5 serrî Y.Y. ke qezaya Silopiya de wesayîtê zirxî da piro, nêweşxaneyî ra vejîya. 

 

16ê gulane de Taxa Dîcle ya qezaya Silopî ya Şirnexî de demo ke tuta 5 serrî Y.Y. vernîya keyeyê xo de  kay kerdêne, wesayîtêk zirxî dabî piro. Serê vengdayîşê welatijan, ambulans amebî cayê hedîse û Y.Y. wedarnabî Nêweşxaneyê Dewlete ya Silopiya. Pêwa giranbîyayîşê rewşa Y.Y. aye sewqê nêweşxaneyêk taybet ê Xarpêtî kerdibî. Y.Y. ke esteyê aye yê kemaxî şikîyayo, nêweşxane ra vejîya. Goreyê agahîyê ke ameyî girewtiş Y.Y. ke hewteyêk nêweşxane de ameyîne dermankerdiş, bi pêşnîyazîyê doktoran do di hewte tênêgêro û dimayê netîceyê tetkîkan ê doktoran do rewşa aye dîyar biba.