Şehrîban Aslan

 

AMED - Parlamentera Partîya Çep a Keske ya Amedî Adalet Kayaye dîyar kerd ke AKP bi serran o destkewtişê cinîyan hedef gêno û partîyê parlementoye dişmenê cinîyan ê û vat: “Ma do bi Partîya Çep a Keske reyde têkoşînêk zaf cîya bivejnî raşte.”

 

AKP 21 serrî yo ke destkewtişê cinîyan hedef gêno û kerdoxê tacîz, tecawuz û şîdetî bêceza verdeno. Nika zî seba ke îqtîdarîya xo serê payan de bivindarno bi Partîya Newera Refah û Huda Parî ke dişmenê cinîyan î, reyde pê kerd. AKP-MHP eno tîfaqî serê çinîkerdişê qanûnê hûmara 6284î awan kerd. Parlementera Partîya Çep a Keske Adalet Kayaye deheqê babete de qisey kerd.

 

‘Waştî cinîyan bi sîstemî reyde girêdaye biverdî’

 

Adalete da zanayîş ke demêk dergo ke xover danî û bi taybetî no 7 serrî yo ke serê cinîyan de tedayêk zaf giran esta. Adalete wina dewam kerd: “Na teda dewam kena. Netîceyê weçînayîşî de tabloyê meclîsî ke vejîya raşte ra asîyeno ke do hetêk bîn hîna zêde îdeolojîk aver bifînî. Polîtîkaya ke hemverê cinîyan yena rayraberdiş bi esasgirewtişê îdeolojîyê tirk-sunî yena rayraberdiş. Hewl danî bi temamî cinîyan hepsê keyeyî bikerî û girêdayeyê sîstemî bikerî.”

 

‘Cinîyan qet têkoşînê xo ra vera nêda’

 

Adalete ard ziwan ke Peymana Stenboli şewêk de ameye feshkerdiş, dima ra zî qanûnê 6284î kerdî babeta bazarî ya tîfaqê weçînayîşî û wian dewam kerd: “Qanûnê Bingeyîn de hewl dayî bedilnayîşan pê bîyarî. Qanûnê tewreyî de xeylê qanûnî ameyî derbazkerdiş û bedilnayîş ameyî kerdiş û xebate ameyî rayraberdiş. Waştî zewacê emre şenike bikerî cuye. Cinîyan her raşteyî de xoverdayîşê xo yê vera nê caardişan rayra berd. Partîya Çep a Keske bi 31 parlamenterê cinîye kewt parlamento. Ma heme cinîyê ke raşteyan ra ameyî. Têkilîya ma hemeyan bi rêxistinê cinîyan reyde esta. Ma do têgêrayîşê hêzê cinîye bibî ewja. Coka ra 31 parlamenterê cinî na nuqta de zaf muhîm.”

 

‘Ma nêverda îqtîdar ser bikewo’

 

Adalete dewamê qiseykerdişê xo de wina vat: “Hedefê ma hîna zêde parlamenterê cinî yo. Ma kampanyaya xo bi cinîyan reyde rayra berd. La teda û zext ameyî kerdiş. Aşma verêne de rojnameger û avûkatî ameyî tepiştiş. Hewl dayî dormeyê tersî awan bikerî. La seba ke îqtîdarîya bîyaye ser nêkewo ma xebatê başan rayra berd. Na xebate xeylê muhîm û ercaye bî. Kurdistan de polîtîkayê şerê taybet yenê rayraberdiş. Ma parlamento de vera nê caardişan de ma do xebatêk zelal rayra bibî. No beyanatê ma de zî ca gêno.” 

 

Ma do têkoşînêk cîya vejê werte’

 

Adalete bale ant serê muhîmîyê awankerdişê Wezaretê Cinîyan û vat: “Ma do seba Peymana Stenbolî reyke bîn bikewa cuye, seba perwerdeyê cinsîyê komelî her ca de bêro dayîş, xebatan bikerê. Meclîs de seba cinîyan wareyêk têkoşînî ame awankerdiş. Ma do Partîya Çep a Keske de têkoşînêk zaf cîya vejê werte. Yew problemo tewr pîl ê cinîyan feqîrî û şer o. Cinî wazenê şer peynî bibo. Polîtîkayê şerê xususî xeylê yeno rayraberdiş. No bi destê selahîyetdarê îstîmlakî pê yeno. Tiryakî û fuhuş cinîyê ciwanan rê ferz kenê. No problemêk gird o. Vernîgirewtişê nê zaf muhîm o. Feqîrî her ke şina  giran bena. Derheqê nê probleman de ma do xebatan bikerê.”

 

'Ganî ma bi eynî qerarî şêrê serê sindoqan'

 

Adalete tewr peyîn qiseykerdişê xo de bale ant serê turê diyîn ê weçînayîşê serekkomarî û wina qedêna: “Kurdî şîyî serê sindoqan û hetê partîya xo tercîhê xo kerdî. Ganî ma weçînayîşê serekkomarî de zî nê tercîhê xo dewam bikerê. Seba ke ma destûr nêda ke faşîzm serbikewo. Zorberdişê hemverê  faşîzmî destê ma de yo. Ma bi ciwan û cinîyanê xo ra bawer ê. Ma bi ruhê ê serkêşan bawer ê. Ma bi eynî qerarî şinê serê sindoqan. Ganî ma ewro seba zorberdişê faşîzmî bi eynî qerarî şêrê serê sindoqan.”