Melîke Aydin

 

ÎZMÎR - Fehîme Poyraze dîyar kerd ke kiştoxê kênaya aye û bi hezaran hemwelatijan faşîzm o û da zanayîş ke seba binkewtişê îqtîdarîya AKPyî, ganî her kes weçînayîşê serekkomarîye de raya xo bierzo û sindoqan bipawo.

 

Weçînayîşê serekkomarîye vera heme kay û şaîbeyan mend turê diyînî rê. Hemwelatijî nika xo hadre kenê ke 28ê Gulane de seba turê diyînî yê serekkomarî raya xo bierzê. Dayîka Denîz Poyraza ke awanîya HDPyî yê Îzmîrî de ameybî qetilkerdiş, Fehîme Poyraze derheqê weçînayîşî de qisey kerd û dîyar kerd ke kênaya aye zî sey bi hezaran hemwelatijan hetê faşîzmî ra ameye qetilkerdiş û seba peynîkerdişê îqtîdarîya AKPyî heme şarî dawetê eştişê rayan kerd û pawitişê sindoqan kerd. Fehîmeye sewbîna vat ke nuqtaya esasî ya çareserîya problemê Kurdî Îmrali yo.

 

‘Wa îradeyê xo bişuxulnê’

 

Fehîmeye da zanayîş ke faşîzm Denîze qetil kerd û tena Denîze nê bi hezaran kesan qetil kerd û wina dewam kerd: “La tewr zêde cinîyan ra tersenê. Cinîyî xoverdayoxî, komelî anê vera yewbînan. Camêrd zî serkewtişê cinîyan nêwazeno. Wazenê cinîyan ganî bitepişî. Denîze qet nêwaştêne zirar bireso kesêk. Ma wazenê dayîk êdî nêbermê. Ma wazenê seba ameyoxê tutanê xo, seba vindarnayîşê gonîye raye bierzê. Her roje merdim yeno qetilkerdiş, teda yena kerdiş. Merdiman bi sindoqan zî tehdît kenê. La her kesî îradeyê xo şuxulneno.”

 

‘Venga muşahîdîye’

 

Fehîmeye venga wayîrvejîyayîşê sindoqan û muşahîdbîyayîşê kerd û wina dewam kerd: “Tay hemwelatijî kal û pîr ê. Nêzanê senî raye bierzê. Înan rê vajêne, wa nêtersê. Eke ma bitersê ma zirar danê xo. Wa şêrî serê sindoqan û raya xo bierzê.” 

 

‘Çareserî Îmrali yo’ 

 

Fehîmeye qiseykerdişê xo yê peyênan de wina vat: “Çareserîya probleme Kurdî Îmrali yo. Ganî bere zîndanan bêrî akerdiş û serekatîya ma serbest bêro verdayîş. Serekê me zî yewîya ma wazeno. Tayyîp Erdogan bi wesîleya Kurdan ser kewt. Na reye zî wa Kiliçdaroglu ser bikewî. Wa berî bêrî akerdiş. Tepişteyê nêweşî wa serbest bêrî verdayîş û bêrî kişta keyeyê xo.”