RIHA - Çalakîya "Nobeta Edaletî" ya keyeyê Şenyaşar 791 rojî yo verê Edlîyeyê Rihayî de dewam kena. Keyeyî çalakîya ewro de nê mesajî da: "Eke no edaleto ke pawitişê mezlûman nêkeno, no edalet îşkence yo." 

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê Hezîrana 2018ine de qezaya Pirsûsî ya Rihayî de hêrişê keyeyê Şenyaşarî kerdibî. Netîceyê hêrişî de mêrdeyê Emîne Şenyaşare û di lajê aye amebî qetilkerdiş. Nê ser de Emîne Şenyaşar û lajê aye Ferît Şenyaşar 9ê Adara 2021ine de vernîya Edlîyeyê Rihayî de dest bi çalakîya Nobeta Edaletî kerdibî. Çalakîya keyeyê Şenyaşarî roja 791ine de dewam kerd.

 

Keyeyê Şenyaşarî serê siba ame verê Edliyeyê Rihayî û pankartê "Seba keyeyê Şenyaşarî edalet" akerd, çalakîya xo da destpêkerdiş. Keyeyî serê medyaya dijîtale de no mesaj da: "Eke no edaleto ke pawitişê mezlûman nêkeno, no edalet, edalet nîyo îşkence yo. Nobeta ma ya edaletî 791 rojî yo dewam kena.”