AMED - Koordînasyonê Agahdarkerdişî yê Partiya Çep a Keske ya Amedî, derheqê tûrê dîyîn ê weçînayîşê serekkomarî de eşkerayîyêke da û vat: "Vengdayîşê ma şarê ma rê oyo ke şêrê serê sindoqan û wayîrê sindoqan û rayanê xo vejîyê."

 

Koordînasyonê Agahdarkerdişî yê Partîya Çep a Keske ya Amedî derheqê tûrê dîyîn ê weçînayîşê serekkomarî de bûroyê xo yê weçînayîşî yê qezaya Bajarê Newe ya Amedî de eşkerayîyêke da. Eywana ke eşkerayîye ci de ameye dayîş beyraqê Partiya Çep a Keske û pankartê bi kurdkî û tirkî yê bi nuşteyê "Raye bidê, sindoqan bipawê, yew zilamî bierşawê" ameyî daliqnayîş. Parlamenterê Partîya Çep a Keske yê Amedî Ceylan Akça, Serhat Eren, Verfekê Partîya Çep a Keske yê Amedî, endam û îdarekarê Partiya Herêmê Demokratîke (DBP) û Partîya Demokratîke ya Şaran (HDP) yê Amedî beşdarê eşkerayîye bî.

 

Hemserekê HDPyî yê Amedî Zeyad Ceylan vernê de qisey kerd, dîyar kerd ke ê bi prosesêk antîdemokratîk şîyê weçînayîş û îqtîdarî heme îmkanê dewlete seba weçînayîşî şuxulnayo. Zeyadî dîyar kerd ke 14ê Gulane de îqtîdar û hemkarê ci xeylêk bêusulî kerdê û vat: “Eşkerayo ke senîn bi sindoq û rayan kay kerdê û rayanê Partîya Çep a Keske seba MHPyî nuştê. Hetêk ra zî operasyonê qirkerdişî yê sîyasî kerdî. Seba ke bêûsulî ke kenê nêvejîyê werte, xeylêk kedkarê çapemenîye ameyî destbendkerdiş. Sewbîna xeylêk avûkatê ke do serê sindoqan de bişuxulîyê ameyî destbendkerdiş û tepiştiş. Îqtîdaro faşîst ê AKPyî tedayê xo yê vernîya weçînayîşî de tu sînor nas nêkerd. Ma do nê 6 rojê peyîn de bi mîlyonan merdimî îqna bikerê ke şêrê serê sindoqan. Reyke bîn venga ma şarê ma rê oyo ke wa şêrê serê sindoqan û îradeyê xo ramojnê. AKP-MHPyî bierşawê û wayîrê sindoq û rayanê xo vejîyê.”

  

Dima ra Parlamentera Partîya Çep a Keske ya Amedî Ceylan Akçaye qisey kerd û vat, înan reyke bîn rengîniya Partîya Çep a Keske bi nasnameyê cîya û bi zafbîyayîşê cinîyan mojna û vat: "Ma tîya yê, biqerar ê û ma do her tim zî tîya de bê. Çi çîyo ke AKP û MHP bido şarê ma nêmendo. Heta vizêr  Stenbol de hêrişê ciwananê kurdan ê govende gêrnayîne kerdî. Bi derbkerdiş destbend kerdî. Seba ke bibê cewabê Soylû û yawerê ey wa her kes şêro serê sindoqan. Amed de serê afîşê xo yê weçînayîşî de ‘A rastî Erdogan’ ameyo nuştiş. Belê, rast o ‘bi rastî’ zî Erdogan seba ke weçînayîş qezenç bikero pêro şîdet û tedayan keno, fek destbendkerdiş û tepiştişan vera nêdano.”