Elfazi Toral

 

WAN - Zozan Ozgokçe reaksîyon mojna hûmara kêm a parlementerê cinî û wina vat: “Ma zihnîyetê camêrdê ke kewtî meclîsî yê hemverê cinîyan zanê. Tirkîya de sîstemêk huqûqî ke cinîyan bipawo çin o.”

 

Weçînayîşê 14ê Gulane yê serekkomarî û parlementerî yê demê 28ine de AKP 266 parlementer vet û 50 hebê ci cinîyan ra pê yeno. CHP 169 heb parlementer vet û 30 hebê ci cinî ya, Partîya Çep a Keske 62 parlamenter vet û înan ra 30 heb cinî ya, Îyî Partî 44 parlamenter vet û tede 6 heb cinî esta, MHP 50 parlamenter vet û ci ra 3 heb cinî bî û TÎP zî 4 parlamenter vet ci ra yew cinî ya. Partîya Çep a Keske ke temsîlkarîya têduştî esas girewt meclîs de temsîlkarîya têduştî pê ard. 

Aktîvîsta Femînîste Zozan Ozgokçeye derheqê weçînayîşî de û polîtîkayê dişmenîye yê vera cinîyan de qisey kerd.

 

Sîstemêk huqûqî ke cinîyan bipawo çin o!

 

Zozan Ozgokçeye dîyar kerd ke netîceyo ke weçînayîşê 14ê Gulane de vejîya ra kêfweş nîya û wina dewam kerd: “Ça yo vatî sîstemê parlementerîye ameyo xurtkerdiş. La tîya de her hetî ra temsîlkarîya cinîye babeta vatişî nîya. Zaf tay cinî dekewtî meclîs. Çîyêk winasî zî esto. Ma zîhnîyetê camêrdê ke dekewtî meclîs zanê. Zîhnîyetê Huda Par û Partîya Newera Refahî yê hemverê cinîyan wesayîtê weçînayîşî de zî xo da teber. Bîyayîşê merdimê winasîye yê meclîsî tehlukeyêk o. Peymana Stenbolî coka ra ame feshkerdiş. Qanûnê hûmara 6284î pê nîno. Çike mekanîzma pê nînê. Kiştişê cinîyan zêde bîyo. Nînê dîyîş. Cinî yena qetilkerdiş, awanîyan ra yenê eştiş, cînayetê ke sey xokiştişî yenê mojnayîş estê. Nê welatî de sîstemêk huqûqî ke cinîyan bipawo çin o.”

 

‘Antişê Peymana Stnebolî de para cinîyanê AKPyî zaf pîl o’

 

Zozane dewam de dîyar kerd ke înan pratîkê cinîyê ke hetê îqtîdarî ra ameyê weçînayîş vînayê û wina vat: “Cinîyê ke kewenê meclîs ganî goreyê cinîyê komelî tê bigêrê. Cinîyê ke bi pratîkê AKP kewenê meclîs seba ma zaf zî muhîm nîyo. Ma vînenê ke seba cinîyan gamêke cidî nêerzê. Babeta cinî, şîdet û qetilkerdişê cinî sinife rê partî rê nêewnîyeno. Seba ke cinîyê payeberzî zî şîdet vînenê. Her ca de bêtêduştî babeta vatişî ya. Ganî ma cinî na nokta de têhet de bê. Feshkerdişê Peymana Stenbolî de para cinîyê AKPyî zaf pîl a. Çîyo tewr asan raydayîşê AKPyî yo. Paştdayîş dayî û yew camêrd awan kerdî. Seba nê zî wa nêvajê meclîsê cinîyan temsîl kenê.”

 

‘Aya ke rengê cinîyan berd meclîs Partîya Çep a Keske ya’

 

Zozane peynîya qiseykerdişê xo de reaksîyon vera xeylêbîyayîşê camêrdan ê meclîsî mojna û vat:  “Vetişê qanûnê derheqê zewacî de emrê qij de estê. Ganî cinî hişmendîyê nê de bê. Ganî ma têkoşîn bikerê. Bêşik ma do hemverê nê de têkoşînê xo dewam bikerê. Aya ke rengê cinîyan berd meclîsê Partîya Çep a Keske ya. No seba ma hêvî yo. Meclîs şarî ra zaf dûrî yo. Ez wazena cinî nê 28ê Gulane de rejîmê yew camêrdî bierşawê. Lazimî bi vurnayîşê meclîsî esto.”