Mîdye Mîqted

 

HELEB - Derheqê babeta zewaco ke emre şenik de yeno kerdiş Endama Koordînasyonê Kongreya Star a bajarê Helebî Elîf Hesen û Verfeka Keyeyê Cinî ya Taxa Şêxmeqsûdî Xezal Şêxmuse bale ant muhîmîya perwerdeyî û kampanyaya ke dayî destpêkerdiş ser û wina vat: “Bi wesîleya perwerdeyî û kampanyaya ke hetê Kongreya Star û Keyeyê Cinîye ra yena rayraberdiş nika zewacê emro şenik kêmî bîyo. Seba çareserkerdişê problemê winasî xebatê ma dewam kena.”

 

Şert û mercê zehmetin, şer, koçberî, qanûnê ke bi zîhnîyetê kanperestî yenê vetiş, hêrişê dewletan yê Helebî vera zewaco ke emrê domanîye de yeno kerdiş zêdîyeno. Coka ra rêxistinê cinîyan tîya de xover danî. Seba çareserkerdişê problemanê winasîyan hewl danî. Derheqê babeta zewacî de Endama Koordînasyonê Kongreya Star a bajarê Helebî Elîf Hesen û Verfeka Keyeyê Cinî ya Taxa Şêxmeqsûdî Xezal Şêxmuse qisey kerd. 

 

'Tarîxê cinî yê şaristanîye' 

 

Verfeka Keyeyê Cinî ya Taxa Şêxmeqsûdî Xezal Şêxmuse bale ant kanîya têkoşînî ser û wina vat: “Verê ke ma derheqê babetê girêdayeyê cinîye de qisey bikerî ganî ma ci ra ver qala tarîxê cinîye yê şaristanîye bikerî û muhîmîyêk tam bidî nê tarîxî. Bi taybetî cinîya homawende ke ked û têkoşîn daya keye û domananê xo. Ganî ma nê cinîyê ke verê cû ra nata ked û têkoşînê xo heta roja ewro arda bikerî nimune û sey perwerde mîyanê komelî de bidî ciwîyayîş û endamê komelî.” 

 

'Şoreşê Rojava de barê tewr giran serê paştîya cinîye de bî’

 

Xezale ard ziwan ke cinî vera zîhnîyetê îqdaran de xover da û wina vat: “Şorişê Sûrîye de û bi taybet Şorişê Rojawanî de baro tewr giran serê paştîya cinîye de bî. Cinî rayîrê azadkerdişê nê komelî de xeylê kede daya ke zîhnîyetê îqtîdarîye bi xelesîya. Her reye bî hedef. Bi taybet serra 2018î de wextê koçkerdişê hemwelatijanê herêma Efrînî yê dew û bajaranê xo ra bîyî hedef."

 

'Zewacê emrê domanîye zêde bî' 

 

Xezale dewamê qiseykerdişê xo de bale ant netîceyê koçkerdişî ser û vat: “Badê serra î netîceyê koçkerdişê hemwelatijanê Efrînî de êdî binê nameyê adetan de domanê kêna ameyî zewecnayîş. No zewaco ke emrê domanîye de ame kerdiş xo reyde laserê xerepnayîşê komelî ard. Zewacê emrê domanîye beno sebebê fekverdayîşî. Sewbîna seba ke wirdî hetî zî yewbînan baş nêşinasnenê problem vejîyeno. Keyeyê Cinîye serê na babete de zî qisey keno.” 

 

Cuya seyyewbînan ya azade 

 

Xezale qiseykerdişê xo yê peyênan de nê çîyan ard ziwan: “Ma sey Keyeyê Cinîye goreyê rêzilnameyê xo qanûnan dîyar kenî. Bi taybetî qanûnê qedexekerkerdişê zewacê emrê domanîye û naskerdişê cinîye yê seba cuya seyyewbînan ya azade muhîm a.”

 

'Bi rayîrê kampanyayan ma vera zewacê emrê domanîye de vejîyenê’

 

Endama Koordînasyonê Kongreya Star a bajarê Helebî Elîf Hesene zî derheqê kêmbîyayîşê gerreyan yê zewacê emrê domanîye ke bi rayîrê perwerdeyî bî de qisey kerd û vat: “Komelê ma yê ewroye de babeta yewbînan ra fekveradayîş muhîm a. Coka ra hetê Kongreya Star û komîteyê girêdayeyê aye ra Kampanyaya Îqazkerdiş û zanayîşî dîya dest pêkerdiş. Seba ke ma vera zewacê emrê domanîye de bivejî. Zewaco ke emrê domanîye de yeno kerdiş xo reyde netîceyêk negatîf ano. Înan ra yew zî no yo ke beno sebebê bilabîyayîşê keyeyî û doman tena maneno. Sewbîna Kongreya Star û dezgehê bîn yê sey Rêxistina Saraye pîya virazîyayî. Nê semedî ra perwerdeyê ma şarî rê ame akerdiş û kombîyayîşê ma yenê viraştiş. La dest pêkerdişî de xeylê cinîyî tewrê perwerdeyî nêbîyî. La dima ra yanî ewro cinî wazenê vera tewrê perwerdeyî bibî û bimusî.” 

 

'Naskerdişê raştîya zewaco ke emrê domanîye de yeno kerdiş’

 

Elîfe da zanayîş ke ê şîyî zîyaretê keyeyan, coka ra zî munaqaşaya serê zewaco ke emrê domanîye de yeno kerdiş, ame kerdiş û vat: “Wexto ke ma şinê zîyaretan û ma kewenê sohbetanê mîyanê komel û keyeyî zafaneyê munaqaşa û vatişanê ma derheqê zewacê emrê domanîye de yeno kerdiş. Ma hewl danî ke endamêk keye û komelî raştîya zewaco ke emrê domanîye yeno kerdiş nas bikero û hetê ci yê xirab bivîno.”

 

'Seba çareserkerdişê probleman xebatê ma dewam kenî'

 

Elîfe wina qiseykerdişê xo peynî kerd: “Hûmara zewaco ke emrê domanîye de yeno kerdiş, her ke şino kêmî bena. No zî bi wesîleya perwerdeyî û awakerdişê komîteyê pêkerde, Rêxistina Sara û Keyeyê Cinîye bî. Seba nê çîyî zî kedêk zêde ame dayîş.”