ANQARA - Heyetanê Rayberdişê Merkezî yê HDP û Partîya Çep a Keske kombîyayîşê hemparî ra dima pare kerd ke ê qerardar ê ke turê diyînî de bi îqtîdarî bidê binvistene û venga her kesî da ke turê diyînî bikero destpêkêkê neweyî.

 

Seba weçînayîşê serekkomarîye yê Tirkîya turo diyîn 28ê gulane de yo. Heyetanê Rayberdişê Merkezî yê HDP û Partîya Çep a Keske weçînayîşanê 14ê gulane ra dima 16ê gulane de kombîyayîşêko hempar kerd û derheqê kombîyayîşî de eşkerayîyêke daye.

 

‘Partîya Çep a Keske bîya hêzê hîrêne’

 

Eşkerayîye de ame vatene ke rixmê teda û hîleyan zî Partîya Çep a Keske Meclîs de bîye hêzo hîrêyîn o tewr pîl. Eşkerayîye de ame parekerdene ke weçînayîşê 14ê gulane ke serkewtişo ke nînan ra pawîyayêne nêqewimîyayo coka wird partîyî zî do rexneyanê xo bidê. ''Weçînayîşî ma rê têkoşînê demokrasî û azadî yê. Îqtîdarê AKP-MHPyî û Îtîfaqê Cumhurî bêmabên hêrişê kurdan, cinîyan, ciwanan, bindestan û muxalefetî keno. Heta nika konseptê şerî yê nê îqtîdarî pê têkoşînê şarê ma ame pûçkerdene. Ma reyna vanê ke ma tîya de yê û xurt ê. No fikr, tradîsyonê têkoşînî qetî do apey nêşorê. Ma do bi hêvî û bawerî faşîzmî qels bikerê, Tirkîya de îtîfaqê tewr hîrayî yê demokrasî awan bikerê û têkoşînê xo ser bivisnê.

 

‘Firsend destê ma de yo’

 

Sey partîya Meclîsî ya hîrêyîne senî ke ma nêverda rejîm turê yewinî de ser bikewo, ma qerardar ê ke turê diyînî de nê rejîmî bin bivisnê. Prosesê weçînayîşî nêqedîyayo. Ma bêhêvî nêbê. Ma eşkenê nê cehenemî biqedînê. Firsend destê ma de yo ke ma turê diyînî de netîceyêka bêhempa û destpêkêkê neweyî bivisnê destî.

 

‘Lapatê peyênî bidê faşîzmî ro’ 

 

Şarê ma yê welat û teberê welatî, rêxistinê ma, dostê ma ganî têkoşînê vera faşîzmî peyê weçînayîşan rê meverdê, turê diyînî de bêkêmasî raya xo bidê û lapatê peyênî bidê faşîzmî ro. Seba ma rexnedayîşo tewr pîl no bibo ke ma nê rejîmî bin bivisnê.”