Gulîstan Şahîn

 

QAMIŞLO - Hemsereka Encûmana Qanûnsaze ya Herêma Cizîrî Arya Ehmede beyanameyê Rayîrberîya Xosere ke 18ê Nîsane de eşkera kerdbî ercnaye û vat: “Nuqtayêke muhîm serê yewbîyayîşê herra Sûrîyeye bî. Heto bîn de Rayîrberîya Xosere 2014î ra heta roja ewro projeyê înan estbî ke serê esasanê netewê demokratîk û seyyebînayîya şaran ameyo awankerdiş. No proje cayê xo girewt û îspat kerd ke çareserîya Sûrîyeye bê Rayîrberîya Xoser û bê projeyê netewê demokratîk nîno çareserkerdiş."

 

Rayîrberîya Xosere ya Vakur û Rojhelatê Sûrîyeye 18ê Nîsane de beyanameyê çareserkerdişê krîzê Sûrîyeye ke 9 nuqtayan ra pê yeno peşkeş kerd. Beyaname serê mîsogerkerdişê heqanê hemwelatijanê Sûrîyeye, peynîkerdişê dagirkerîya tirke û domnayîşê têkoşînê vera terorî, tepîya agêrayîşê koçberan, caardişê edaletê komelî û vilakerdişê çimeyanê Sûrîyeye pêroyê hemwelatijan meşru keno. Derheqê beyanameyî de Hemsereka Encûmana Qanûnsaze ya Herêma Cizîrî Arya Ehmede ercnayîşanê xo ma rê pare kerd. 

 

‘Beyaname 18ê Nîsane de ame eşkerakerdiş’

 

Aryaye destpêkê qiseykerdişê xo de bale ant beyanameyo ke ameyo pêşkêşkerdiş ser û wina vat: “Demê peyênan de Rayîrberîya Xosere ya Vakur û Rojhelatê Sûrîyeye beyannameyêk derheqê çareserkerdişê krîzê Sûrîyeye de peşkeş kerd ke demêk zaf muhîm û musaît de vetî. Rewşa Sûrîyeye bi bedilnayîşê zaf muhîman ra derbaz bena. Pêkewtişê Sûrîyeye no 12 serrî yo dewam keno û heta roja ewro rayîrêk ke nê pêkewtişan çareser bikero çinî bî. La Rayîrberîya Xosere seba şaranê Sûrîye û şaranê Vakur û Rojelatê Sûrîyeye xo berpirsiyar dî û bi beyanameyek dîyar kerd ke do no pêkewtiş senî bibo zî do bêro çareserkerdiş û 18ê Nîsane de bi hawayêkî fermî pê hesna.”

 

‘Beyanameyî de nuqtayê muhîmî ameyî pêşkêşkerdiş’ 

 

Aryaye da zanayîş ke beyannameya ke ame pêşkêşkerdiş de 9 nuqtayê muhîmî estî û wina dewam kerd: “9 nuqtayê muhîmî beyanameyî de nuştê. Nuqtaya yewine yewîya herra Sûrîye bî ke Rayîrberîya Xosere nizdîbîyayîşê xo da mojnayîş ke yewîya herra Sûrîyeye çareserkerdişê pêkewtişê Sûrîye ya. Nuqtaya bîn zî bi hukmatê Şamî reyde dîyalog a. Eke dîyalog nêbo çareserî zî pê nîna. Nuqtaya bîn zî ganî sîstemê demokratîk û merkezî bêro awankerdiş. Nuqtaya bîn zî peynîkerdişê dagirkerîya Tirkîya ya serê herême ya. Heta ke serê herra ma de dagirkerî bibo tu çareserî pê nîna. Nuqatayêke bîn zî koçberê Sûrîye yê ke derbazê dewletan bîyî ya. Rayîrberîya Xosere dîyar kerd ke ganî  sînor bêrê akerdiş û koçber agêrî welatanê xo. Nuqtayê muhîmî ameyî dîyarkerdiş.”

 

 ‘Mesajê Rayîrberîya Xoser aştî, aramî û seyyewbînayîye şaran o’ 

 

Aryaye dîyar kerd ke Rayîrberîya Xoser serê projeyê neteweyê demokratîke ameyo awankerdiş ke rayîrê aştî, asayîş û seyyewbînayîye esas gêno û domna: “Rayîrberîya Xosere serra 2014î ra heta roja ewro projeyê înan ke estbî serê esasanê netewê demokratîk û seyyewbînayîya şaran ameyo awankerdiş. No proje cayê xo girewt û îspat kerd ke çareserîya Sûrîye bê Rayîrberîya Xoser û bê projeyê netewê demokratîke nîno çareserkerdiş. Tu çareserî bê Rayîrberîya Xoser nêbena. Mesajê Rayîrberîya Xoser timî aştî, asayîş û seyyewbînayîya şaran o.”

 

‘Beyaname do pêkewtişê Sûrîyeye peynî bikero’

 

Aryaye tewr peynî veng daye hêzê mîyanneteweyîyan û wina qedêna: “Bado ke no beyaname ame eşkerakerdiş hêvîya ma no yo ke hêzê mîyanneteweyî beyanameyê Rayîrberîya Xosere çiman ver de bigêrî, bi hawayêk cîdî ser de vinderî û munaqaşayê hîrayî rayra bibî. No pêkewtiş şaranê Sûrîyeye bêhêz kerd. Xeylê koçberî, kiştiş û teror virazîya. Vengê ma no yo ke beyaname esas bigêrî ke pêkewtişê Sûrîyeye bêro çareserkerdiş.”