WAN - Dayîkanê Aştîye dîyar kerdî ke emser Roja Dayîkan seba polîtîkayê şerî yê îqtîdarî xemgîn pêşwazî kenê û vatî, êdî nêwazenê dayîkî bibermê.

 

Ewro Roja Dayîkan a. Her serre diyîn yewşemeyê aşma Gulane de yeno pîrozkerdiş. Meclîsê Dayikanê Aştîye na roje xemgînî pêşwazî kenê. Meclisê Dayîkanê Aştîye yê Wanî Saadet Oklu û Zarîfe Bor derheqê Roja Dayikan de qisey kerdî.

 

Saadet Okluye, Roja Dayikan heme dayîkan rê pîroz kerd û wina vat: “Verê tutê ma vilan girewtêne û ardêne. Vatêne, ‘ewro roja dayîkan a’. La ewro vera nê vilan cenazeyê tutanê ma yenê.”

 

‘24 saetî tutanê ma bombavaran kenê’

 

Saadete dîyar kerd ke ê êdî nêwazenê cenazeyê tutanê înan bêrê û wina vat: “Wa kezeba tu dayîke nêveşa, wa hisêrî nêrê veradayîş. Ma nê şerî nêwazenê. 24 saetan tutanê ma bombavaran kenê. Vanê şima terorîst ê. Ma terorîst nîyê. Ma zî evdê Homayî yê. Homa ma kurd viraşt. Ma kurd ê, ma serberz ê. Merdimî hemverê polîtîkayê îqtîdarî bi reaksîyon ê. Tutê ma terorîst nîyê. Heme tutê nê dayîkan ê. Pêrûne wend o. Ê zulmî ra remayî. Keyf ra nêşî. Tu rayîr înan rê nêverdayî. Tutanê ma uca de zî bombavaran kenê. Ma nêeşkenê esteyê tutanê xo zî bigîrê. Ma cenazeyê tutanê xo gênê nêverdenê ma defin bikerê. Erdogan, şarê kurdî serê dînî binpay keno. Ma her çî zanê. Nê dîndar nîyê, nê dînperest ê.”

 

‘Mi lajê xo çuwal de defin kerd’

 

Saadete, dîyar kerd ke nêverdayê aye lajê xo bişû û defin bikero û wina qedêna: "Mi tutê xo çuwal de defin kerd. Tena ez ney sey mi bi mîlyonan dayîkî estê. Dayîkê ke esteyê tutanê xo nêdîyê estê. Ma seba înan zaf xemgîn ê. Ma roja înan ê Roja Dayîkan pîroz kenê. Her keyeyî ra çar yan zî 5 kesî tepişte yê. Her yew bajarêk cîyayî ra yê. Dayîkî nêeşkenê tutanê xo bivînê. Agahî ci ra nêgînê. Ez venga wezaretê dade kena. Wa berê zîndanan abibê. Ma dayîkî aştîye wazenê. Ma aştîye de bi israr ê. Ma tu kesî ra nêtersenê. Kezeba ma vêşena. Ma nêwazenê kezeba dayîkê bînan biveşo. Wa dayîkî bêrê ma destê xo bidê yewbînan û hemverê nê zulmî bibê.”

 

Dayîkî nêwazenê gonî birijîyo

 

Dayîka bîne Zarîfe Bor zî dîyar kerd ke Roja Dayîkan pêro manaya xo vînî kerda û wina vat: “Roja Dayîkan de tutî dayîkê xo reyde vilî û diyarî gênê. Yê ma zî koyan ra cenaze yenê ma rê. Dayîkî zaf xemgîn ê. Wa aramî û aştî bêro nê welatî. Ma nêwazenê êdî gonî birêjo. Wa hîsêrê dayîkan êdî nêvarê. Dayîkî 40-50 salî yo eynî dejî ancenê. Rewşe her ke şina xira bena. Tutê ma şinê sûkê yenê kiştiş. Bi kiştiş û tepiştişî çîyêk nîno çareserkerdiş. Her çî bi ziwanêk baş eşkeno bêro çareserkerdiş. Ma do heta key binê nê zulmî de bê.”

 

‘Heqê ma zî estê’

 

Zarîfeye, dîyar kerd ke bi 21 serrî yo eynî kes no welatî rayra beno û vat: "Bi 21 serrî yo ma rojêke weş nêdî, her tim îşkence, tepiştiş, zulm estbî. Ma zî wazenê rehet biciwîyê. Heqê ma zî estê. Ma zî cuyêka merdimayî wazenê. No welat de heqê ma zî estê. Ma zî heqê xo wazenê. Ma ziwan, nasnameyê xo wazenê. Homayî înan senî viraşto ma zî wina viraşto.”