RIHA - Çalakîya "Nobeta Edaletî" ya keyeyê Şenyaşarî 782 rojî yo dewam kena. Şaredarê verî yê Cenevrê Rêmy Pagani, Partiya İnsoumise ya Fransayî Angélique Schmidt û rojnameger Rachad Armanios serdayîşê çalakî kerdî. 

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê Hezîrana 2018ine de qezaya Pirsûsî ya Rihayî hêrişê keyeyê Şenyaşarî kerdibi. Netîceyê hêrişî de mêrdeyê Emîne Şenyaşar û di lajê ey amebî qetilkerdiş. Serê nê de Emîne Şenyaşar û lajê aye Ferît Şenyaşar 9ê Adara 2021ine de vernîya Edliyeya Rihayî de dest bi çalakîya Nobeta Edaletî kerdî. Çalakîya keyeyê Şenyaşarî roja 782ine de dewam kerd. 

 

Emîne Şenyaşar çalakîya xo binê pankartê "Seba keyeyê Şenyaşarî edalet" de kerdî. Seba ke Ferît Şenyaşar tewrê xebatê weçînayîşî bî tewrê çalakîya ewro nêbê. Ewro şaredarê verî yê Cenevrê Rêmy Pagani, Partiya İnsoumise ya Fransayî Angélique Schmidt û rojnameger Rachad Armanios serdayîşê çalakî kerdî. 

 

Emîneye serdayîşê heyetî de bale ant serê qetlîam û têkoşînê xo. Heyet, serdayîşî de dîyar kerd ke do her tim paştdayîşê keyeyî bikerê. Emîne zî dîyar kerd ke paştdayîşê heyetî ra hêz girewta.