Gulîstan Dursun

 

RIHA - Ciwanê ke reya yewine do raye bierzî dîyar kerdî ke ameyoxê xo Partîya Çep a Keske de vînenê.

 

Weçînayîşê 14ê Gulane yê serekomarî û parlementerîye yê donemê 28ine siba yo. Partîya Çep a Keske xebata xo bêmaben dewam kena. Riha de zî raşte bi raşte tax bi taxe xebat yena rayraberdiş. Riha de mîlyonêk û 219 hezar û 445 kesî do raye bierzî. Hûmara kesê ke reya yewine do raye bierzî zî 190 hezar û 279 kesî ya. Ciwanan polîtîkaya îqtîdarî rexne kerd û vatî ke ê ameyox û hêvîye Partîya Çep a Keske de vînenê.

 

Seba rojanê azadan… 

 

Rojda Ceylan: Bi taybet seba azadîya cinî û ciwanan ez do raya xo bida Partîya Çep a Keske. Vera faşîzmî seba rojanê azadan. Partîya Çep a Keske ser bikewa do ameyox hîna weş biba. Ez veng dana heme ciwanan ke wa raya xo bidî Partîya Çep a Keske. Nameye partîye bibedelîya zî wa bibedelîya. Ez raya xo dana partîya xo.

 

‘Wa cinî seba xo raya xo bida Partîya Çep a Keske’

 

Suzan Kaplan: Ez raya xo ya ewile dana Partîya Çep a Keske. Ez na rewşe ra zî kêfweş a. Seba ameyoxêk azad seba îmkanê güreye ganî ma dormeyê Partîya Çep a Keske de bêrî têhet. Riha de cinî planê diyîne de ya. Bi partîya sîyasî ya Kurd reyde ma cinîyan êdî her raşteyî de vînenî. Coka ra zî wa cinîyî seba xo vajî Partîya Çep a Keske. 

 

‘Do Partîya Çep a Keske serkêşîye bikera’

 

Bermal Karadag: Seba krîzê ekonomî, seba problemê perwerdeyî çareser bibî, ez vana Partîya Çep a Keske û do na partî serkêşîya çareserîye bikera. Do paştî bida heme azadîyan. Ez veng dana heme embazanê xo yê ke reya yewine raye do bierzî. Seba azadîye ma raya xo bidî Partîya Çep a Keske.

 

Rojîn Semen: Seba azadîye rayanê xo danê Çep a Keske. Vernîya ma de seserra diyîn esta. Xeylêk muhîm o. Partîya Çep a Keske nê seserre de do wezîfeyê xo bi ca bîyara. Seba nê wa her kes raya xo bido Partîya Çep a Keske.

 

Seba ameyoxêk baş… 

 

Hatîce Vural: Mi bi Çep a Keske reyde hêvî dî. Seba nê vana Partîya Çep a Keske. Partîya Çep a Keske seba vernîgirewtişê şîdetê serê cinîyan têkoşîn kena. Ez raya xo ya serekkomarîye zî dana Kiliçdaroglu. Hêvîdar a sozê xo bi ca bîyara.

 

Yagmur Ozgezer: Seba ameyoxê xo raya xo dana Çep a Keske. Ez ameyoxê xo emanetê înan kena. Ez raye seba serokomarî zî dana Kiliçdarogluyî.