AMED - Weçînayîşî rê tena yew roje mend û amadekarîyê peynî yê asayîşê sindoqan yenê kerdiş. Elîf Turane derheqê Merkezê Taqîpkerdişê Weçînayîşî ke Amed de ameyo awankerdiş de qisey kerd û dîyar kerd ke waştişê înan weçînayîşêk adilane û demokratîke yo.

 

Weçînayîşê serekkomarî û parlementerî yê donemê 28ine rê 24 saetî ra tay wext mend. Goreyê dayeyanê Weçînayîşî yê Berzî nê weçînayîşî de welat de 60 mîlyon û 697 hezar û 843 kesî do raya xo bierzî. Nê weçînitoxan ra se ra 50,60ê înan zî cinîyan rap ê yeno. Heto bîn de 4 mîlyon û 904 hezar û 672 kesî zî do reya yewine raye bierzî. Amed ke bê maben tede xebate yena rayraberdiş de zî do 3 hezar û 675 sindoqî bêrî awankerdiş û mîlyonêk û 143 hezar û 887 kesî raye bierzî.

 

4 hezar muracatî

 

Babeta pawitişê sindoqan, asayîşê sindoqan de seba ke bajaranê Kurdistanî de şik yeno ciwîyayîş, hem welat, hem rêxistinê komelkî yê sîvîl û hem zî partîyê sîyasî kampanyaya muşahîdîye dayî dest pêkerdiş û amacê înan no yo ke asayîşê sindoqan bigêrî. Çarçeweya na xebate de bi vengê Partîya Çep a Keske 4 hezarî ra zêdêr hemwelatijî seba muşahîdî muracat kerdî. 

 

Merkezê Taqîpkerdişê Weçînayîşî ame awankerdiş

 

99 Sazîyê Komelê Sivîl (STO) bajar de reyna bi eynî amacî deklere kerd ke Merkezê Taqîpkerdişê Weçînayîşî ameyo awankerdiş. Sazîyê ke Platformê Paştîdayîş û Pawitişê Bajarî awan kerdî derheqê babete de rojanê verênan de eşkerayîyêka nuştekî dabî û wina vatbî: “Seba ke îradeyê weçînitoxan tam tecelî bikero, seba ke kar û xebata rayan bi hawayêko baş pê bêro, netîceyan de şik çinî bo ganî xebate zelal bêra rayraberdiş. Sey Platformê Paştîdayîş û Pawitişê Bajarî ma hişmendîya berpirsîyarîya prosesî de yî û rayaumûmîye rê dîyar kenê ke Merkezê Taqîpkerdişê Weçînayîşî reyde prosesî nizdî ra taqîp bikerî.” 

 

Binpaykerdişê heqan do sazgehê têkildar reyde bêrê neqlkerdiş

 

Verfeka Platformî û Sereka Odeya Tabîban ê Amedî Elîf Turan derheqê Merkezê Taqîbkerdişê Weçînayîşî de agahî pare kerd. Elîfe dîyar kerd ke seba proses bi hawayêko demokratîk û adilane bêro rayraberdiş waştişê xo deklerayson de dîyar kerdê û wina vat: “Hîn sazgehî binê banê platformî de heyetê taqîbkerdişî yê xoser awan kerdibî. Nê weçînayîşî de do prosesêk wina bêro rayraberdiş. Prosesê kampanya weçînayîşî zî ci de hemverê binpaykerdişê heqan ê bêrê ciwîyayîş do bi avûkatanê ma yê zerrîwaz reyde mudaxale bêro kerdiş û sazgehê têkildar reyde bêrê neqlkerdiş.”

 

Elîfe sewbîna ard ziwan ke do Merkezê Taqîbkerdişî de zerrîwazî bibê û wina qedêna: “Waştişê ma yê tewr serîn oyo ke ma heqê xo yê weçînayîşî bişuxulênê. Ma wazenê no weçînayîş demokratîk û adîlane bêro rayraberdiş.”