RIHA - Çalakîya "Nobeta Edaletî" ya keyeyê Şenyaşarî 780 rojî yo dewam kena. Keyeyê Şenyaşarî seba roniştişê dewaya ke 3ine Dadgeha Cezaya Giran a Meletî bêro kerdiş, venga tewrbîyayîşî kerd.

 

Çalakîya "Nobeta Edaletî" ya keyeyê Şenyaşarî ke 9ê adara 2021ine de verê berê Edliyeyê Rihayî de dayê destpêkerdiş, dewam kena. Dimayê qirkerdişî dosyaya “kargehî” ameye xirakerdiş û bi qerarêk bi dosyaya “nêweşxaneyî” reyde kerdî yew. Roniştişê ewilî yê dosya do siba bêro vînayîş.

 

Emîne Şenyaşare ke 780 rojî yo têkoşînê xo yê edaletî verê Edliyeyê Rihayî de dewam kena, ewro seba problemê weşîye tewrê çalakîye nêbî. 

 

Ferît Şenyaşaro ke çalakî dewam keno, ewro no mesaj pare kerd: "5 serrî yo edalet pê nêameyo û 5 serrî yo têkoşînêk esto, 5 serrî yo zilmêk esto û 5 serrî yo 20 dozgerî û 4 dadgerî yê dewa ameyî vurnayîş. Siba reyna roniştişê ma esto. Dosyaya kargeh û nêweşxaneyî kerdî yew. Nika Tirkîya zanena ke hukm destê îqtîdarî de serdest de yo. Dozger û dadgerî zî raştî zanê la seba ke kewtê destê îqtîdarî çîyê lazimî nêkenê. Ma venga her kesî kenê ke tewrê roniştişî bibê.”

 

Roniştişê ewil do siba saete 09.30 de 3ine Dadgeha Cezaya Giran a Meletî de bêro kerdiş.