Sema Çaglak

 

ŞIRNEX - Cinîyê qezaya Cizîrî dîyar kerdî ke ê do seba destfînayîşê heqanê cinîyan û azadîya tepişteyanê sîyasîyan raya xo bidî Partîya Çep a Keske û venga wayîrvejîyayîşê sindoqan kerd.

 

Weçînayîşê 14ê Gulane rê 3 roje mend. Partîya Çep a Keske xebata xo ya weçînayîşî hem Tirkîya hem zî Kurdistan de bêmaben domnena. Cinîyî zî raşteyan de derheqê weçînayîşî de veng û mesajanê xo anî ziwan. Cinîyê qezaya Cizîrî ya Şirnexî zî waştiş û mesajê xo yê derheqê weçînayîşî vatî.

 

‘Vera şîdet û kiştişê cinîyan’

 

Suzan Bulduke dîyar kerd ke aye do seba serkewtişê heme şaran raya xo bida Partîya Çep a Keske û domna: “Vera bindestî, zilm, şîdet û kiştişê cinîyan raya ma bidêne Partîya Çep a Keske ra ya. Çimkî Partîya Çep a Keske seba cinîyan xebatan rayra bena. Sewbîna gama ke ma ser kewtî do tepişteyê ma yê sîyasî zî azad bibî.”

 

Seba ke cinî nêrî qetilkerdiş

 

Kulîlk Bulduke zî dîyar kerd ke ganî cinî reng û vengê xo her raşteyê komelî de bimojna û vat: “Zerrîya heme kesan bîya gişt. Heta kam ca na tedaya serê ma do dewam bikera. Êdî ma ciwîyêka azad û bi erc wazenê. Xora raya ma Partîya Çep a Keske ra ya. Ma bi taybetî heqanê cinîyan û destkewtişê înan wazenê. Wa cinî nêrî qetilkerdiş û her raşteyê komelî de cayê xo bidîra.”

 

‘Wayîrê rayanê xo vejîyê’

 

Helîm Aslan zî dîyar kerd weçînayîş seba şaran çareserîyêk muhîm o û vat: “Ganî ma qetî serbikewê û berê zîndanî abibo. Ma wazenê peynîya nê zilm û zordestî bêro. Êdî ma kurd zulmê serê xo qebûl nêkenê. Seba nê pêrûne zî ma do weçînayîşî de raya xo bidê xo. Wa pêro cinî û dayîkî rayanê xo bişuxulênê û wayîrê ray û sindoqan vejîyê.”

 

‘Wa cinîyî yewîya xo awan bikerê’ 

 

Ayten Budak zî vat, do bi sloganê “Jin Jiyan Azadî” serkewtiş bîyarê û vat: “Cinî tewr zêde seba heqê xo têkoşîn kenê û seba azadî û seyyewbînî raşteyan de yê. Coka rayê ma zî Partiya Çep a Keske rê yê. Zulm  û zordarî rê êdî bes o. Wa pêro cinî seba bîyayîş û nasnameyê xo şêrê serê sindoqan û rayanê xo bi şuxulênê. Ganî tu rayêk ma nêveşo. Wa pêro cinîyî bibê yew û wayîrê partîya xo vejîyê.” 

 

‘Ma do bi pawitişê raya xo serbikewê’

 

Tewr peyîn zî Emîne Bulduk vat: “Zerrîya cinî û dayikan hetê şer û zulmî ra xeylêk pirr a. Ma nêwazenê êdî cinî bêrê kiştiş û bi zilmî reyde rî bi rî bimanê. Ma do pêro yewîya xo awan bikerê û roja weçînayîşî bi pawitişê raya xo serkewtiş bîyarê.”