HATAY - Cinîyê qezaya Dortyolî ya Hatayî ke qerarê xo yê weçînayîşî dayî dîyar kerdî ke ê sere de azadîya Rayberê PKKyî Abdullah Ocalanî wazenê û do mohrê xo bidî dare ro.

 

Weçînayîşê 14ê Gulane rê tena 4 roje mend. Kurdistan û Tirkîya de mîtîngê Partîya Çep a Keske bi coşêk gird dewam keno. Partîya Çep a Keske Osmanîye û Hatayî de mîtîng pê ard û hetê cinîyan ra eleqeyêk gird dî. Qezaya Dortyolî ya Hatayî de sloganê ‘bê Serek cuye nêbena’, ‘biciwîyo Serek Apo’ bê maben ameyî berzkerdiş û şarê Dortyolî mesajê xo yê weçînayîşî bi hawayêko zelal mojna.

Cinîyê Dortyolî ajansê ma rê qisey kerd û vatî ke ganî her kes seba azadîye raya xo bido Partîya Çep a Keske.

 

‘Wa her kes raya xo bierzo’ 

 

Sadika Çelîkere qiseykerdişê xo de bale ant bêhuqûqîyanê ke Tirkîya de yenê cuyayîş ser û vat ke seba vernîgirewtişê nê bêhuqûqîyan ganî her kes raya xo bida Partîya Çep a Keske û vat: “Ez zî raya xo dana Partîya Çep a Keske. Ma raya xo danê xo. Ma nêwazenê Erdogan ser bikewo. Ma vera zilmî de yê. Wa her kes şêro sindoqan ser û raya xo bierzo.”

 

‘Acaba do no teda heta kam ca dewam bikero’

 

Cinîya bi nameyê Salîha Narîne zî wina ercnayîşanê xo kerd: “Ma qey ma nêzanê raya xo bidê kamî. Ez Amed ra ya. Ma raya xo danê xo. Ma wazenê na rewşe ra bivejê. Ma perîşan bîyî. Ma bajarê xo ra dûrî yê, seba ke na rewşe raşt biba ma do raya xo bidî xo. Ma do nê weçînayîşî de ser bikewê. Coka ra ganî ma heme şêrî sindoqan ser û raya xo bierzê.”

 

‘Wa gonî nêrija’

 

Şefîka Arhane zî nê çîyan ard ziwan: “Seba ke ez Kurd a ez do raya xo bida Partîya Çep a Keske. Acaba heta kam cayî ma do binê zextan de biciwîyê. Ma do rayêke bidê Partîya Çep a Keske rayêke zî bidê Kemal Kiliçdarogluyî. Ma aştîye wazenê. Ma nêwazenê gonî birija. Wa her kes raya xo bierzo û boyêka asan bigîro.”

 

‘Partîya Çep a Keske partîya cinîye ya’

 

Hanîfe Kayaye zî dîyar kerd ke Partîya Çep a Keske do bi hawayêko xurt nê weçînayîşî de ser bikewa û ganî cinîyî xo wayîrê rayanê xo bivejî û têkoşînê xo bikerê yew. Hanîfeye vat ke Partîya Çep a Keske partîya cinîyan a û coka ra zî wazena aştî û azadî ser bikewê. 

 

Cinîyan ra tewt peynî Latîfe Tekdage qisey kerd û aye zî da zanayîş ke seba ke Kurd a do raya xo vîşêrê Partîya Çep a Keske nêda tu kesêk û wina peynî ard: “Erdogan zilm keno. Ma do seba ziwanê xo raya xo bidî xo. Ma wazenê serekê ma zîndan bivejîyo. Ma do ser bikewê û Erdoganî bişirawê. Ma do mohrê xo bidê dare ro.”