Rabîa Onver

 

COLEMÊRG - Weçînayîşî rê demêko kilm mend û Colemêrg de xebate bêmaben dewam kena. Aktîvîsta TJAye Şadîye Kirmizigule xebatê ke Colemêrg de yenê rayraberdiş ercnaye û dîyar kerd ke her rayêke do vernîya zilm, qetilkerdiş, şîdet û şîdetê serê cinîyan bigêra. Şadîye vat:"Do Colemêrg de raye seba azadîye bêra eştiş.”

 

Xebatê weçînayîşî her cayê Kurdistan û Tirkîya de dewam kenê. Colemêrg de zî xebata Partîya Çep a Keske bêmaben dewam kena. Aktîvîsta Tevgerê Cinîyanê Azadan (TJA) Şadîye Kirmizigule derheqê xebatan de ercnayîşî kerd. 

 

Seba şarê Kurd weçînayîş tarîxî yo 

 

Şadîyeye da zanayîş ke weçînayîşê 14ê Gulane weçînayîşêk tarîxî yo û seba cinî û ciwanan bi taybetî xeylê muhîm o. şadîyeye wina dewam kerd: “No 20 roje yo ke ma raşteyan, tax û dewan de gêrenî û Partîya Çep a Keske bi şarê xo danî naskerdiş. Seke yeno zanayîş dewaya girewtişê HDPyî estbî û coka ra ma bi Partîya Çep a Keske reyde kewenê weçînayîş. Wexto ke ma şarê xo reyde yene têkişt ma aye coşî vînenê. Weçînayîşêk tarîxî yo. Ma xebata xo bi hêvî û heyecanêk gird rayra benî.”

 

‘Wa cinî seba azadîya xo raye bierzê’

 

Şadîyeye ard ziwan ke bi taybetî cinî xebata weçînayîşî rayra bena û domna: “Eno weçînayîş seba cinîyan xeylê muhîm o. Seba ke kiştişê cinîyan peynî bibo, kiştox bêro cezakerdiş, no weçînayîş zaf muhîm o. Waştişê cinîyan peynîbîyayîşê kiştişê cinîyan, peynîbîyayîşê şîdetî yo. Wexto ke cinî şêrî sindoqan ser do kiştişê cinîyan, şîdet, destdergê, Peymana Stenbolî xo vîra nêkerî. Wa nê çîyan bîyarî verê çimanê xo û dima ra raya xo bierzê.”

 

‘Şarê ma kişta ma de yo’

 

Şadîyeye qiseykerdişê xo wina peynî kerd: “Ma hedef kenê ke hirê namzedanê xo bişirawê meclîs. Xebata ma bi coşêk gird derbaz bena. Ma şarê xo ra nê hêzî gênî. Şarê ma xebatan de kişta ma de yo. Seba şirawitişê îqtîdarî çi destê înan ra yeno kenî. Şarê ma tewrê ma xebatan rayra beno. Ez vengê wayîrvejîyayîşê sindoqan kena şarî rê. Wa her kes wayîrê raya xo bivejîyo. Her rayêke do vernîya mergê cinîyan, tepiştiş û zilmê serê cinîyan bîyara.”