RIHA - Emîne Şenyaşar ke roja 778ine ê Nobeda Edaletî de qisey kerd û vat, "Do bi paştdayîşî edalet bêro.”

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê Hezîrana 2018ine de qezaya Pirsûsê Rihayî de hêrişê keyeyê Şenyaşarî kerdibi. Netîceyê hêrişî de mêrdeyê Emîne Şenyaşar û di lajê aye amebî qetilkerdiş. Nê ser de Emîne Şenyaşar û lajê aye Ferît Şenyaşarî 9ê Adara 2021ine de vernîya  Edliyeyê Rihayî dest bi çalakîya Nobeta Edaletî kerdibi. Çalakîya keyeyê Şenyaşarî roja 778ine de dewam kerd. Emîne û Ferît Şenyaşar serê sibayî de Pirsûs ra ameyî verê berê Edliyeyê Rihayî. Keyeyî, pankartê “Seba keyeyê Şenyaşarî edalet” daliqnayî û dest bi nobete kerdî. 

 

Emîne Şenyaşare Nobeta Edaletî de qisey kerd û wina vat: “Bi nêzdîyê 3 serrî ez seba edaletê tîya nişnena ro. Pey edaletî ez şîya Anqarayî, Stenbol û hema xeylêk cayê bînî la edalet çin o. Edalet verê nê hukmatî de çin o. Eke merdimî wayîrê dîn û îman bo, eke merdim gunayan ra biterso biedalet beno. Eke nê çinî bê, edalet zî nêbeno. Ganî ma bi tenê nêverdê. Eke ma paştdayîşê yewbînan bikerê do edalet zî pê bêro. Eke ma nê nêkerê do bêedaletî dewam bikero. Çi beno wa bibo heta ke lajê mi bêro verdayîş ez o tîya ra nêşêrî.”