KOCAELÎ - Roniştişê yewin ke bi îdiayê "Îdarekerdişê rêxistine" Şadiye Manape bî 30 serrî yo tepişte ya, amebi akerdiş do 2yîn Dadgeha Cezaya Girane ya Kocaeliyî de bêro vînayîş. Şadîye hema zîndan ra newe vejîyabî, reyna amebî destbendkerdiş. 

 

Şadîye Manapa ke bi 30 serrî yo tepişte ya 1ê Kanûna 2023ine de Zîndanê Cinîyan ê Gebzeyî ra amebî tehliyekerdiş labelê senî tehlîye bî, reyna ameye destbendkerdiş û 5ê Kanûne de ameye tepiştiş. Roniştişê yewin ê bi îdiayê "Îdarekerdişê rêxistine" Şadiye rê amebi akerdiş do 2yîn Dadgeha Cezaya Girane ya Kocaeliyî de bêro vînayîş.

 

30 serrî bi îşkence û grevê vêşanîye derbaz bî

 

Şadiye Manapa ke 1992ine de Riha de ameye destbendkerdiş û Dadgeha Asayîşê (DGM) yê Amedî de ameye muhakemekerdiş, bi îddiayê "endama rêxistine ye" cezaya muebbetî ameye birnayîş. Şadîye demê ameye tepiştiş 24 serrî bî. Zîndanê Riha, Mîdyad û tewr peyîn zî Zîndanê Cinîyan ê Gebzeyî de mende. Şadîye zîndanan de bi xeylêk îşkenceyan reyde rî bi rî menda û xeylêk rey kewta grevê vêşanîye. Şadiyeya ke tim aram bî û têkoşînê xo kerdêne dimayê 30 serrî tepiştişê xo de 1ê Kanûna 2023ine de saetê serê sibayî de ameye tehlîyekerdiş. 

 

Dimayê karê tehliyeyî hema Şadiye zîndan ra nêvejîyabî bi sebebê cipersayîşêk 2020î de hetê Muduriyetê Emniyetî yê Kocaeliyî ra ameye destbendkerdiş. Demê destbendkerdişê Şadiye ame dergkerdiş. 5ê Kanûna 2022ine de sewqê Serdozgerîya Komare ya Kocaeliyî ameye kerdiş. 

 

Dimayê 30 serrî dima reyna ameye tepiştiş

 

Şadîye 4 rojan Muduriyetê Emniyetî yê Kocaeliyî de ameye vindarnayîş û dima ra 5ê Kanûne de aye berdî Edliyeyê Kocaeliyî. Bê îfadeyê aye dozgerî bêro girewtiş bi waştişê tepiştişî sewqê Dadgeha Cezaya Sulhî ameye kerdiş. Dadgerî qerarê tepiştişê Şadîye da. Şadîye bi îddiayê "Endamîya rêxistine" ameye tepiştiş û dima ra aye berdî Zîndanê Kandirayî. Seba Şadiye Zîndanê Kandirayî de ameye tepiştiş, 7ê Kanûne de testê aye yê Covid-19î pozîtîf vejîya xeylêk cayê Kurdistan û Tirkîya de çalakî ameyî organîzekerdiş û venga tehliyekerdişê Şadiye ame kerdiş.

 

Do roniştişê yewin siba bêro vînayîş

 

Îddianameyê Serdozgerîya Komare ya Kocaeliyî bi îddiayê "Îdarekerdişê rêxistine" amade kerd hetê 2yîn Dadgeha Cezaya Girane ya Kocaeliyî ame qebûlkerdiş. Do roniştişê ewilî yê Şadîye 2yîn Dadgeha Cezaya Girane ya Kocaeliyî de bêro vînayîş.