Rabîa Onver

 

COLEMÊRG - Cinîyê Geverijî ciwîyenê bale antî serê muhîmîyê weçînayîşê pêroyî yê 14ê Gulane û vatî: "Do hemverê qetilkerdişê cinîyan û seba azadîya fehmî û ziwanî do rayanê xo bidê Partîya Çep a Keske." 

 

Xebatê weçînayîşê pêroyî yê 14ê Gulane dewam keno. Partîya Çep a Keske dewe, qeza û bajarê Kurdistan û Tirkîya xebatê xo bi coş û kelecanêk pîl dewam keno. Dewe û qezayê Colemêrgî zî xebate bi kelecanêk pîl pê yeno.

 

Cinîyê ke Geverê Colemêrgî de ciwîyenê fikrê xo ajansê ma rê qalî kerdî.

 

Şehrîban Tekînalp, dîyar kerd ke weçînayîşê pêroyî yê 14ê Gulane de raya bido û vat: "Ez o raya xo bidî Partîya Çep a Keske. Seba ke tenê na partî hemverê qetilkerdişê cinî têkoşîn kena. Ez hêvî kena ke êdî cinî nêrê qetilkerdiş û kiştoxê cinîyan zî bêrê muhakemekerdiş. Seba nê ma reyna vanê Partîya Çep a Keske." 

 

Sevîm Kina, da zanayîş ke her tim raya xo daya Partîya Demokratîke ya Şaran (HDP) û wina vat: "Serekkomarî de raya xo seba Kiliçdarogluyî bişuxulnê û seba parlamenterî zî raya xo bidê Partiya Çep a Keske. Ez hêvî kena ke qetilkerdişê cinî bi peynî bibo, şîdetê hemverê cinî bêro vindarnayîş. Seba ke demê îqtîdarê AKPyî de ma xeylêk embazanê xo vînî kerd. Ma hêvî û waştiş kenê ke dimayê weçînayîşî hem seba cinîyan û hem zî seba  welatî azadîyêk pê bêro."

 

‘Ma azadîye wazenê’

 

Ferîde Dede zî dîyar kerd ke wa êdî heq û edalet serbikewo û wina vat: "Ma kurd ê û ma do raya xo bidê xo. Seba cuyêka hizûr û seba cuyêka bêkiştiş ma do raya xo bişuxulnê. Ma wazenê êdî azadî pê bêro.”

 

Viyan Gule, qiseykerdişê xo de wina bale ant serê muhîmîyê Partîya Çep a Keske: "Ez o raya xo bidî Partîya Çep a Keske û Kemal Kiliçdaroglu. Ma hêvî kenê ke berê zîndanî abibê. Ez seba şaran û seba cinîyan azadî wazena."

 

‘Ma wazenê bi ziwanê xo perwerde bivînê’

 

Zerda Ergudar, da zanayîş ke seba ziwanê dayîke do raya xo bida Partîya Çep a Keske û wina vat: "Seba ez bieşkî bi ziwanê dayîke perwerde bibî, ez raya xo şuxulnena. Waştişê ma oyo ke Partîya Çep a Keske her ca de serbikewa. Ma wazenê qetilkerdişê cinîyan peynî bibo. Sewbîna ma wazenê ke serê herra xo de bi ziwanê xo qisey bikerê. Ez a bawerî de ya ke no weçînayîş seba ma baş derbaz bibo." 

 

Gulcan Bozkurte, wina qalê muhîmîyê weçînayîşî kerd: "Ez sey cinîyêka kurde paştdayîşê Partîya Çep a Keske kena. Partîya Çep a Keske do biba vengê kurdan. Ez seba ke kurd a ez o raya xo bidî Partiya Çep a Keske. Nika rayîr ver bi azadîya fehmî ameya padayîş, demo ke ma fikrê xo anê ziwan polîsî verê berê ma de vindenê. No cîyabîyayîşêk pîl o û hemverê kurdan bi ca yeno. Ez sey cinîyêka kurde azadî wazena.”