Gulîstan Dursun

 

RIHA - Riha ke akerdişê buroyan açarîyeno mîtîngî de cinî eleqeyêk gird mojnenê. Hemverfeka Partîya Çep a Keske Rihaye de Senem Erîşî dîyar kerd ke faşîzm nê çîyî ra hende terseno ke parlementerîya cinîyan fîna û înan kerd zîndanan. Seneme vat ke do cinîyî ser bikewê.

 

Weçînayîşî rê demêk kilm mend. Rihaye de xebat bêmabên dewam kena. Partîya Çep a Keske partîyanê bînan ra hîna zêde namzedê cinî mojna. Akerdişê buroyanê weçînayîşî yê cinîyan eleqeyêk gird vîneno. Cinî bi kincanê xo yê herêmîyan yê kurdî tewrê akerdişî benê. Hemverfeka Rihaye Senem Erîşe xebata weçînayîşî ya Partîya Çep a Keske ercnaye.

 

Seneme da zanayîş ke roja destpêkerdişê munaqaşayê weçînayîşî merkez û qezayan de xebate rayra benê û wina vat: “Bi taybetî ma bi cinîyan reyde yenê têhet. Bi coşêk gird ma pêşwazî kenê. Cinî bawer kenê ke do rejîmê faşîst şêro. Na babete de malumatê weşî estê. Cinî 21ê serrî yo aciz bîya. Cinî wazena biba wayîrê vatişî. Seba nê îqtîdaro faşîst bişirawê her çîyî kenê. Cinî do nê saltanatî birijnê. Ma nê çîyî raşteyan de baş vînenê.”

 

‘Hêvîya cinîyan Partîya Çep a Keske ya’

 

Seneme dewamê qiseykerdişê xo de dîyar kerd ke Rihaye de hêvîya cinîyan Partîya Çep a Keske ya û wina vat: “Merdim bi Partîya Çep a Keske bawer kenê. Paştîdayîş danê û ma xebate rayra benê. Ma nê rihê xoverdayoxî adetanê xo ra gênê. Emîne Şenyaşare di serrî yo verê edlîyeye de xover dana. Seba edaletî xoverdayîşêk gird dana. Cinî paştî dana nê xoverdayîşî.”

 

Cinîyan ra eleqeyêk gird

 

Seneme qiseykerdişê xo wina domnaye: “Cinî eleqeyêk gird mojnena boruyê weçînayîşî. Bi coşêk gird buro yenê akerdiş. Cinî xo buroyê weçînayîşî yê cinîyan de rehet îfade kena. Cinî her raşteyî de têkoşînê ma de ca gêna. Riha zaf zêde aver şina. Partîya Çep a Keske Rihaye do Rihaye de rekor bişikna. Cinî vera pêro hêrişan di ser bikera.”

 

Seneme tewr peynî bale ant serê asaayîşê sindoqan ser û vat ke ganî her kes wayîrê sindoqan bivejîyo, sindoq îradeya şarî yo û ganî her kes wayîrê înan bivejîyo.